28‏/12‏/2010

فشل -27-12-2010 -


- أتدعين الجهل ، أم تستمتعين بإلتفافهم حولك ؟!!
- وهل تضيفي " الامر لا يعنى شىء " كخيار ؟؟
- عم تبحثين !!
- نكهة لا أجدها في اى منهم ،من غير المنصف أن تلوم امرأة إذ حرصت على ذوقها المميز ...
-ذوق مميز !!حقا ... ذوق يلائم امرأة تكره نكهة الحلوى !!! 
*****
تخاف الــ ...
تعترف بذلك تماما مدركة فوبيا جديدة تضاف الى قائمة جبنها التى لا تنتهى!!!
*****
تفكر فى خوض التجربة ، يصلون اليها سريعا ...
كالمجنونة تركض هرباً ...
لم تفرغ منه بعد ...!!!
*****
تقرر ...
تحاول ...
تستجيب ...
تتأكد الآن أن خداع الآخرين ، مهمة سهلة امام محاولة خداع نفسها ...
تستسلم لفشلها السريع بسعــــــادة...
:) :) :)



24‏/12‏/2010

Not Your Business !!!

بصـــــــــــوا


مبحبش حد يتكلم عنى من ورايا 



ومبحبش حد ينقل كلام اقوله لحد تانى

ومبحبش حد يتدخل فى حياتى طالما مسمحتلوش بكدة 


ومبحبش حد !!


:D :D



01‏/11‏/2010

نصيحة ... وعجبتنى


عمرو عاطف كاتب شاب ، وغير كدة من اهم اصدقائى اللى طلعت بيهم من الجامعة 
فى العادى هو بيقول جمل درر 
بس دى عجبتنى علشان لايقة على  موقف بمر بيه على طول
 ما ناس تسخفك وتسخف افكارك لمجرد انهم مش بيحبوا يتناقشوا وبياخدوا الحاجة زى ماهى ، او انهم يعتبروك صغير ولسة مطلعتش من البيضة ( عايزة اعرف انا اينى بيضة دى اللى هتساعنى)
المهم عمرو كان ليه رأى عجبنى اووووووووووووى :

فى اى موضوع فى حياتك
خدى حياتك كانها منتج بتسوقيه
واحترمى اللى يحترم حياتك ومنتجك واشتريه زى ما يشتريكى
واللى مش يحترمه متعملهوش اعتباار
اعتبريه خارج الخطه الاعلانيه بتاعت المنتج بتاعك

27‏/10‏/2010

if u care !!

simply 
i hate selfish 
and
 i never want some one to take care of me
while i ignore ( his\her ) back 
so
if u don`t care
won`t wait anything from me except
"ignore"

23‏/10‏/2010

حكمة لم اعييها بعد ..!!




عندما بدأت اشعر انه اصبح نظامى فى الحياة ...، تبينت ان هناك حكمة من هذا النظام ... ولكننى لم اعييها بعد ، فقررت ان اسجلها بدفتر مدونتى عللّى يوما أجد الجواب فأسجله لاحقاً :

لِما تبقى دوماً تلك الاشياء التى لا نُريد على مقربةٍ منا ...، بينما تَبعُد عنا مسافة المستحيل اشياء اخرى نرغب فيها وبشدة ....؟!!

07‏/10‏/2010

خلى عندك صـــــــــــــوت

حملة اجتماعية مش هدفها سياسى
هدفها ان يكون عندنا صوت ....
لو حابين تعرفوا معلومات عن الحملة وتشاركوا فيها ادخلوا هنا :

بلاش سلبية كل يوم عدد الجروبات بتاعة الفيس بوك مثلا واللى بتطالب بالتغيير بيزيد ...
جروبات بتقول مش عايزين :
مش عايزن غلاء للأسعار
مش عايزين أانحدار مستوى الأخلاق
مش عايزين حروب طائفية بين مسلمين ومسيحين
مش عايزين مش عايزين مش عايزين
طب ازاى اتحركنا علشان نتخلص من اللى مش عايزينه ونحقق اللى عايزينه ؟؟
من الأخر بقى احنا كلامنا كبير وقعدتنا على النت دى مخليا كل واحد يعمل فيها مجاهد ومحارب ومحدش بيتحرك
الجروبات تحركات سلبية
المظاهرات تحركات سلبية
الرغى والكلام اللى من غير فعل برضه سلبية
خليك ايجابى
خلى عندك صوت وشارك فى انك تصنع حاجة بجد 
مش الهدف ان عدد الجروب يبقى مليون علشان التغيير يتحقق 
التغيير هيتحقق لو واحد من كل مليون نوى انه يعمل حاجة بجد ....
مين هيخلى عنده صوت ؟؟؟؟



05‏/10‏/2010

بلياتشو...

لطالما كرهت البلياتشو...
منذ صغرى....
وقتها لم تتح لى سنواتى القليلة
ان أدرك أسباب شعورى الفطرى ...

والآن ...
اعى تماما اننى كنت اخاف وجهه 
لا اعنى الرسومات والألوان الغريبة ...
بل أعنى فقط نظرات عينه
اكره زيف نظراته .....
تلك التى تحمل حزن عميق ...
تخفيه محاولات تحريك شفتيه ...
فى وضعية تلك الابتسامة المدهشة !!!
كرهته كما ظللت اعلن كرهى ...
لكل ماهو مزيف ....
واليوم، لا ادرى... 
كيف لم أتخذ قرار صارم ضد نفسى ...
وأنا اراها "هذا البلياتشو " بكل وضوح....!!!!!



30‏/09‏/2010

رائحة المــــوت ...

منذ ساعات اندلع حريق بالدور الاول بالمنزل المجاور لمنزلنا ...
يعود لأذنى صوت الجارة المقابلة عندما لاحظت الدخان المتصاعد من النافذة أمامها بدأت بعدها تحركات الجيران السريعة ،أحدهم يجرى ليتصل بالمطافىء وآخرون يحملون السلم ليحاولوا الدخول عبر النافذة بعد أن عجزوا عن كسر الباب ، تخرج احدى الجارات خرطوم المياة من نافذتها حتى يصل الى المنزل أمامها ...
ورغم كل هذا الوقت سيارة الأطفاء لاتصل ، والنيران لا تنطفىء ....
تزداد كثافة الدخان وتتحول السماء للون رمادى كئيب يمنع الرؤية ، يصعب من مهمتهم فى اقتحام المنزل عبر النافذة فحرارة النيران لا تطاق ....
تخنقنى رائحة الدخان الممتزجة برائحة أخرى أضع يدى على انفى لتجنبها ، ومع ذلك تقتحمنى تلك الرائحة الباردة الغريبة ، أشعر بالأختناق   فتتساقط دموعى رغما عنى !!!
وصلت سيارة الاطفاء بعد ساعة ونصف يفسح لها الرجال الطريق لتقوم بمهمتها ....
فجأة تتوقف الحركة ولاأسمع سوي الصمــــــت ....
حتى تخرج صرخة احدى السيدات بالشارع تكاد تقتلع أذنى ....
تذعر أمى تسـألنى :
- ايه اللى حصل ؟
-(يخرج صوتى ببطء ) بيقولوا واحدة كانت فى الشقة ماتت هى وبنتها ...
-( تطلق آنة مكتومة وهى تحاول منع دموعها ).... أنتى متأكدة ؟؟؟
-( اجيبها وانا استغرق بتفكيرى ) سمعتهم دلوقتى بيقولوا انهم ماتوا ....
لم أجرؤ ان أخبرها اننى شممت رائحة الموت الباردة ...، تنتابنى قشعريرة لتذكرها مرة آخرى فأعود لبكائى دون توقف ... !!!



26‏/09‏/2010

الوزن الزايد جريمة يعاقب عليها القانون !!!

يعنى ايه الوزن الزايد مخالفة ؟!!!
سمعت خبر ان فى اليابان دلوقتى بيدرسوا قانون ان اللى وزنه زايد بيعتبر ارتكب مخالفة زيه زى اللى ركن صف تانى مثلا
يعنى زى ما كان خانقنى فى الصين فكرة انى بعمل مخالفة على اللى هيخلف اكتر من اتنين
كنت خلاص هاشد فى شعرى وانا بسمع عن خبر الوزن الزايد ده!!


مش عارفة العالم دى عندها ايه فى دماغها ...
وانتو مالكو ؟؟
واللى استفزنى اكتر انى قريت ان ناس مبسوطة من خبر زى ده لان من وجهه نظرهم ان الاوفر ويت او الوزن الزايد بيضر الصحة !!!
يعنى اذا كان التدخين اللى بيضر بصحة البنى ادم واللى حواليه مجرد بيتمنع ، يبقى ليه بقى اتدخل فى حياة ناس عايزة تضر نفسها واعملهم مخالفة وعقوبة!!
يعنى برضه سمعت من واحد زميلى فكرة عمل مكافأت للى يروح الجيم او يلعب رياضة يعنى فكرة الثواب واعتقد انها فكرة حكيمـــة جدااااا ...
 لكن اعاقب الناس تؤتؤتؤ ....

وبعدين يا سبحان الله انا كنت فاكرة ان عندنا احنا بس حكاية الوصاية دى بس للاسف طلعت عند العالم كله ...
ومش بعيد ان نلاقى مخالفات كتيــــر بعد كدة على اننا مثلا شربنا تلات كوبايات ماية بدل كوباية واحدة فى اليوم بمناسبة ازمة المياة العالمية ، او ان مثلا حد مبيحبش اللون الفوشيا علشان بيعمل زغللة فى العين فيلغيه من الالوان واللى هيلبسه هيتاخد مخالفة ولازم يدفع غرامة .
وهتوصل بقى لغسلت رجلك وسنانك قبل ما تنام ؟ ...،اتكلمت فى التليفون كام مرة ؟..، نمت على جنبك اليمين ولا الشمال ...؟!!

فى الغالب الناس بتقول العالم بيتطور واحنا واقفين فى مكاننا ...
وفعلا انا ملاحظة ان العالم بيتطور فى تفعيل ثقافة وصاية الاب على ولاده اللى لازم يلزموا الصمت الرهيـــــب علشان يكونوا عيال متربية وبابا يجيبلهم شيكولاتة !!!
ولا بلاش شيكولاتة علشان الاوفر ويت ، مشوها مسلـــوق بقى
:@ :@

"تمييز" ... فيديو ضد التمييز

كنت فى ورشة تابعة لمركز "الجسر للتنمية والحوار " اسمها خليهم يشوفوها بعنيك


الحقيقة استفدت من الورشة دى كتير فى ازاى يبقى عندى صوت واعبر عن كل حاجة بتشغلنى ، ده غير انى اتعاملت مع ناس بافكار مختلفة ولقيت ازاى ان كل الناس دى بتحترم افكار بعض ودى حاجة صعب انك تلاقيها فى الواقع العملى علشان كدة كانت الورشة من اهم الورش اللى حضرتها وأثرت فيا تأثير حقيقى .

21‏/09‏/2010

إعلان .....

" نقلا عن موضوع  انت في نعمه لاتشعربها فاحمد الله عليها "
أراد رجل أن يبيع بيته وينتقل إلى بيت أفضل

فذهب إلى أحد أصدقائه وهو رجل أعمال وخبير في أعمال التسويق 

وطلب منه أن يساعده في كتابه إعلان لبيع البيت

وكان الخبير يعرف البيت جيداً فكتب وصفاً مفصلاً له

أشاد فيه بالموقع الجميل والمساحة الكبيرة

ووصف التصميم الهندسي الرائع ، ثم تحدث عن الحديقة وحمام السباحة .. الخ

وقرأ كلمات الإعلان علي صاحب المنزل الذي أصغى إليه في اهتمام شديد
وقال

أرجوك أعد قراءة الإعلان

وحين أعاد الكاتب القراءة

صاح الرجل يا له من بيت رائع

لقد ظللت طول عمري أحلم باقتناء مثل هذا البيت

ولم أكن أعلم إنني أعيش فيه إلي أن سمعتك تصفه

ثم أبتسم قائلاً من فضلك لا تنشر الإعلان

فبيتي غير معروض للبيع




13‏/08‏/2010

-----------------

نفسى اجيب عقل تانى غير ده 
اللى رافض انه ينسى ذكرياتك
وقلبى ينسى انه عرفك
ويسمح بغيرك جوايا 
نفسى اما اقرا كلام منك
احسه عادى ومتأثرش 
ونفسى اعمل شيفت ديليت
لكل حاجة ربطتنا ببعض


10‏/08‏/2010

أبونا ... رمضان :)

انا مبسوطة ان الشهر ده جه بقى ...
كان واحشانى وواحش ناس كتير اوى .....
ميجيش الا كل سنة مرة ...
علشان يقيس غلاوته عندنا ...
هنعمله خاطر ونبقى كويسين ...
هنعمل حسابه ونحاول منغلطش ...


بالنسبة ليا رمضان عامل زى الاب....
الواحد يتكسف يعمل حاجة ...
تشوه صورتنا البريئة  قدامه ...
دايما بنحاول نحسسه انه عرف يربى 
واننا قادرين نقاوم كل غلطة جوانا ...


هأبعد عن غلطاتى اللى بكررها كتير
وهستغل الايجابيات اللى جوايا
علشان  اعمل حاجات  ....
عارفة انه هيكون عايزنى اعملها 
وتخلينى وقتها استحق انى اطلب مكافأتى ...
اصلى عايزة فانوس جديد ...:) D:

استاذى ...

** انت اللى علمتنى ازاى ادى .. ومحطش فى بالى فكرة أيه اللى هأخده  ؟ ، منتا دايما كنت بتدينى من غير ما يكونلك اى طلب فى المقابل .
** انت اللى علمتنى اسمع  اللى حواليا ..... مانا دايما كنت برجعلك عشان تسمعنى وبتسمعنى .
** علمتنى ادى ظهرى لأى موجة ... ومعّبرهاش  .
** وأهتم بقواقع ونجوم وكابوريا واى حاجة تانية بتستخبى فى الرملة  "أبحث عن قوتك فى اعماق اعماقك ،أبحث عن تفاصيل تميزك ، فالتفاصيل الصغيرة هى ما تجعلك مختلفا... والأختلاف سر قوتك @  " .




عارف .... انا بدين لك بفضل كبير لأنك صنعت انسانيتى ....



( السنة دى كانت المرة الاولى من سنين اللى منسافرش فيها مكان فيه بحر ...، حسيت انه واحشنى اوى وانى مفتقداه اوى ... حسيت انى لازم اعترفله باللى بحس بيه من ناحيته ، حسيت انى لازم أوفى حق التلميذة على اعظم اساتذتها )

هيهـــــات D:


(النظرة التفاؤلية الموجودة فى النوت دى وجهة نظرى الشخصية ...، مش بجبرك تلتزم بيها من الأخر يعنى :D :D)

كنت فاكرة انى مبقتش اتكسف  وبقيت بت جامدة وحركات يعنى والواضح ان اللى فيه طبع مبيغيروش مهما  حاول من سنة تقريبا كتبت عندى فى اجندتى انى مش هارجع ابقى بتكسف تانى ...
وللأسف رجعت ...   
:$ :|

*****
بلاش وشى يحمر وصوتى يسرسع ، اصل ميصحش واحدة فى اعلام وعايزة تبقى مخرجة تعمل زى مانا بعمل كدة ;
حاولت .....
بقى اى موقف احوله لضحك واكنى مش واخدة بالى انى لازم اتكسف قال يعنى بقى ...
B-)

*****
 كنت فاكرة انى نجحت  بس هيهات هيهات هيهات يعنى  ، وشى احمر معرفتش اتكلم ، كنت بتنفس بسرعة  وببص فى وش اختى  المفروض تنقذنا ...
 اه يمكن انا الكبيرة بس هى العاقلة وهى اللى دبستنا فى موقف زى ده ،بس الحمد لله الموقف خلص تقريبا الى انقذنا اننا هربنا...
:D :D

*****
يمكن الموقف مكنش مستاهل  بس الخضة وحشة وهى دى مشكلتى  ،مش بعرف اتكلم وانا مخضوضة
حسيت انى محتاجة مارد يقولى : " باسنت طيرى انتى "
:@:@

*****
انا لحد ناو ...
بضحك على شكلى وشكل اختى اخوات بصحيح  K ، ومحدش يقوللى مينفعش كدة ولازم تتغيرى ،صدقونى " من شب على شىء شاب عليه " ، يعنى متحاولش تتغير ...علشان فى يوم هيجى موقف يحسسك ان كل جهدك  راح هباااااااااااااء
وزى ما قولتلكم : هيــــــــــــــــــــــــــــــــــــــــــهات



06‏/08‏/2010

MISS U

من وحى أغنية "طـــــــــال - مى سليم " ليس إلا :) :) :
معتقدش ان ده كان بناء على اتفاق سابق
لا لا لا انا فاكرة كويس متفقناش على كدة  ؟؟؟
اخر مرة قولت هتشوفنى قريب 
استنيت ساعة وبعدها يوم و.....
خلاص كل القريب اللى انا عارفاه خلص!!!
*****
متعرفش انا بتضايق ازاى ...
اما بلاقيهم عارفنى ..
بيكلمونى كتير بنفتح مواضيع
بعرف جديدهم وبيعرفوا جديدى
ببقى عارفة انى بقول المعلومة ناقصة
علشان فاضل اخر جديد لسة مقولتوش
نفسى اقوله قريب :
" .... أخيرا رجع تانى "
*****

بعدنا اوى 

حاسة انى مبقتش عارفاك 
مش فاكرة الا صورة منغبشة منك 
عارف انا بكدب 
للأسف .... لسة حافظاك زى مانا 

03‏/08‏/2010

لم اعد أميز نكهتك !!

لتكف عن حديثك !!!
عذرا ولكن تزعجنى كلماتك 
اراها فقدت مذاقها الذى أعشقه 
لما لم اعد أشعر بها و .... بك ؟؟
حبيبى لتجد لى الأجابة ...
لما لم أعد أميز نكهتك ؟!!


عندما اقتربت نحوى هذا الصباح ..
هل تذكر تعابير وجهى ؟
وحين سألتنى : لم الذعر!!
قلت : لم اسمع صوت خطوتك 
حتى لا ترانى أسأل نفسى :
كيف لم استطع تمييز عطرك ؟!!


سألتك : أتكتنفك برودة ؟؟
لقد شعرت برودتى بلمستك
وفشعريرة مخيفة 
حين لففت حول عنقى ذراعك ؟!
أتخلى اليوم الدفء عن يدك ؟؟


وحين نظرت الىّ بقوة ...
لتقرأ هذا الذى اخفيه 
لم تفرح دقات قلبى ..
كما تفعل دوما 
ولم ترد عينى ان تطيل البقاء


رجاء لتبحث عن سرى بقلبى 
فأنت تعلم خباياه أكثر ..
:( :(



02‏/08‏/2010

معنديش حظ !!!

معرفش هتصدقونى لو قلتلكم انى وانا نايمة  امبارح فجأة جت على بالى مسابقة فنون اون لاين اللى كنت مشتركة فيها وقولت : " ياااااااه لو كسبت هابقى اسعد واحدة فى الدنيا !!" .
*****
انا كل شوية ادخل التوبيك اللى عليه المسابقة اتأكد ان ده اسمى ...، وانى اللى كنت كاتبة القصص اللى كسبت دى !!! ...، واتأكد مكتوب : " باسنت مجدى خطاب " مش حد تانى !!!.
*****
اصلى متعودتش انى اكسب يعنى ده مش العادى بتاعى ، يعنى فى الكونو كانوا كل اخواتى يكسبوا وانا لأ ... فى كيس الشيبسى ... حتى الكوتشينة ، فأنى اكسب مسابقة مشترك فيها ناس كتيــر وكلهم متميزين كانت الجملة الوحيدة اللى بتيجى على بالى :" انت بتحلم يا حلمى !!".
*****
عارفيين انا فضلت مكتئبة يوم ونص بحالهم بعد ماعرفت نتيجتى افتكرتنى انى جايبة  تقدير جيد مع ان " عمرو " - زميل وصديق رحلة الدراسة وما بعدها ان شاء الله - راح الجامعة واتأكدلى انى جايبة جيد جدا ...، بس ظلمت حظى معايا وقولت عليه "فقر" لأنى متأكدة وحسبتها ، والحمد لله طلعت جايبة  جيد جدا وطلعت ان مش كل حاجة حسابات واننا ساعات بنحتاج بس شوية حظ ...
*****
" الحمد لله ربنا معايا " ..... كل ما ربنا يساعدنى فى حاجة احس انى مش لوحدى وعمرى ما كنت لوحدى :) 
*****
على طول بقول لحظى انت غبى وغاوى تعاندنى ، وبعدها الاقيه بيثبتلى انى انا "الغبية" طول مانا معتقدة انى معنديش حظ !!.


(ممكن اكون فرحانة زيادة واوفر بس لو انا حتى كنت كسبت بونبونة ، المكسب فى حد ذاته أمل ، وانا محتاجة اوى للأمل ده )
:) :)

09‏/07‏/2010

هدنة ...


سأمنح عقلى رحلة و اجازة مفتوحة
لا حدود للوقت  ...
 سيصحب قلبى عقلى فى رحلته
ليبدئا الهدنة ...
****
هدنة لتستقر الاوضاع بينهما
هدنة ليوجدا نقاط الاتفاق
ويتخلصا على الفور من كل اختلافاتهما
 كى تهدأ تلك الروح المجنونة داخلى
فقد سئمت رغبات كل منهما
فى ان تنصف احدهما دون الاخر ...
*****
من بعدها اخلد الى نومى مباشرة ...
دون احلامى المزعجة الشريرة
التى تجعلنى اراك مكبلا بغابات الاشواك
فتشدنى افكار عقلى بعيدا عن طريقك
وتلومنى دقات قلبى كلما ابتعدت خطواتى
*****
صرت لا افهم افعالى ...
بل ربما لا وجود لتلك الافعال من الاساس
فكلها بقايا نزاعات حملتها داخلى ...
ووضعتها طفل مشوه !!!
*****
احتاج هدنة
 تولد قرارات تجعلنى لا اندم أن أتخذتها
وعندما افعل ...
لا أكون انسان اخر غيرى أنا...


16‏/06‏/2010

اهداء لدود القراية .....:D

بالرغم من انى معرفش يعنى ايه دودة قراية بس ده كان وصف قرايبى كانوا بيتريقوا عليا فيه علشان وانا صغيرة كانوا كلهم يبقوا بيعملوا اى حاجة وانا عمالة اقرا فى كتب طبعا يعنى انا مكنتش بقرا كتب كتب يعنى بس كنت بحب الروايات وكنت بحسها مسلية اكتر من حاجات تانية كتيييييييييييير 
طبعا ده كان من زمن انا تقريبا كل شهر يبقى حلو اوى لو مسكت كتاب وقريته ....
بس بجد لقيت موقع اقل ما يقال عنه انه تحفه ....
فيه كتب من كل مكان وزمان - ده فيه كتاب لرئيس القسم بتاعى - 
وبجد حبيت انى اشارك بيه كل اللى بيحب يقرا وبالاخص كل الدود ( متخافوش وصف حلو مش وحش ) ....




الموقع فيه مجموعة كبييييييييييييرة من الكتب المفيدة والمهمة وانا معرفش مين اللى ربنا هيجازيه خير وعمل الاختراع ده بس انا لقيته فى منتدى النادى ( شاابوه لاحلى اعضاء فيه :)) ) ...
يلا هاف فين يا دود القراية 

11‏/06‏/2010

العنف هو الحل ...!!!

كنت داخلة النت عادى انا قريت عن الخبر ده :
خالد محمد سعيد



يمكن الخبر كان فرصة للى عايز يشمت فى مصر يشمت وبقت حالة من " اللى ما يشترى يتفرج ".....،
واللى مش عايز يشمت فى مصر قرر يشتم فى مصر ... فى الحكومة والشرطة وحتى نفسه لانه مستحمل الهم ده ....،
انا مش بتبع اى حزب حكومى او غير حكومى .... يعنى مش جاية ادافع عن حد بس انا بفكر كأنسان ... العيب مش فى الحكومة ولا غيره ....
العيب بقى فيـــــــــــــــــــــــــــــــــنا !!!
فيه ايه يا جدعان ؟؟؟؟
احنا ليه بنعمل كدة فى بعض ...
يعنى حالة خالد هى الحالة الطبيعية لينا ....
بقى عندنا كمية من الطاقة السلبية والغل بنطلعهم بابشع الصور ....
بذمتكم مش انكو تشوفوا راجل ثلاثينى ماسك عيل صغير بيعجنه مش بيضربه فى الشارع بقى حاجة مبتخلناش نفكر ولو للحظة ايه السبب فى اللى بيحصل بينهم ... ماهو عــــــادى
انك تلاقى شاب عشرينى فى اتوبيس بيتطاول على راجل كبير بيحاول يركب الاتوبيس و ببطئه فى الركوب معطل الاستاذ العشرينى عن ميعاده المهم وبالتالى حقه
يتنرفز ويقل ادبه ... ماهو حقه !!!
انك تلاقى شوية عيال صغيرين لسة طالعيين من المدرسة اتلموا على بنت ماشية فى حالها ( طبعا متوقعيين بيعملوا ايه :-0 )
*********
بيمر عليا كل يوم خناقات وشتايم وكل التحابيش بقى ... بس عمرى ما وقفت قدامها زى ما ما وقفت قدام الموقف ده :
( مرة كنت فى الاتوبيس والسواق بينادى عن اللى مدفعش التذكرة واتنرفز ان محدش بيرد ...، بس بعد شوية دور على اللى مدفعش اكتشف انه راجل عجوز ... الراجل بص فى الارض واتكسف السواق طبطب على كتفه وقاله :"ربنا يفتحها عليك يا ابويا ").
التسامح والرحمة مبقاش هو الطبيعى .... الاخلاق والرقى وكل التفاهات دى بقت موضة قديمة ....
 بقينا فى زمن شعاره :" العنف هو الحل !!! "

ادعوا لخالد بالرحمة ، وادعولنا كلنا اننا نعرف نرحم بعض ....