02‏/06‏/2011

احياناً ببتسم بجد ...

اما ابقى مستعجلة والعربيات مش عايزة تقف وانا بعدى الطريق ، والاقى سواق يروح موقف عربيته ومشاورلى انى اعدى 
*****
لما الاقى زميلى - اللى كنت بقول عليه تافه :$ - يجرى على راجل كبير ويساعده فى انه يعدى الشارع ويشيل عنه شنطه كمان
*****
لما بنت "مسلمــة" تقوم لست كبيرة "مسيحية " فى اتوبيس وأسمع دعوتها اللى بجد :" عقبال ما اشوفى ولادى زيك "
*****
لما بفتح حوار مع واحدة جنبى فى المترو ، ويتدخل باقى الركاب وتقعد كل واحدة تحكى حاجة تخصها  وننسى ان فى الأصل احنا حتى منعرفش اسماء بعض 
*****

لما بنت صاحبتى -عرفتها على النت - تبعتلى :"انا بحبك فى الله " 

*****
لما بفتكر ان عندى صحاب "بجـــد" وان قوتى مبلاقيهاش غير وانا وسطيهم 
*****
لما بنتجمع انا وصحابى فى الشغل على ساندوتشات الفول والطعمية والبطاطس واحنا عارفيين إن الميزانية مش هاتسمح بأكتر من كدة 
*****
لما الاقى واحدة صاحبتى من ايام ثانوى تتصل بيا تسأل عليــا ومش اى حاجة غيـر انها تسـأل عليا 
*****
لما بفتكرك وانا ماشيـة فافرد ظهرى ;) واتأكد ان الحب حاجة حلوة بجــــد :" والله :) "




كلنا بنضحك وكلنا بنبتسم ...
بس التعبير الهايل اللى بيظهر على وشنا ده 
ساعات بيكون مطبوع من القلب 
ساعتها بحس انى ببتسم بجد ...


التدوينة الثانية بـ حملة : دَوِنْ

هناك 7 تعليقات:

  1. إحساس جميل بجد لما تحس بالحب بيتنطط حواليك فى كل ناحيه ولما تحس بالالفه مع الناس من حواليك وتشوف الود في عيونهم رغم ان مافيش سابق معرفه
    الواحد ساعتها بيحس براحه .. وبأمان

    تدوينه خلتنى ابتسم بجد :)

    ردحذف
  2. تصدقى نفس الحاجات تقريبا اللى بتخلينى ببتسم بجد

    ردحذف
  3. هي حاجات تخلي اي بني ادم حتى الفقري منهم يبتسم من قلبه

    ردحذف
  4. ربنا يديم ابتسامتكم يااااارب
    :) :)

    ردحذف
  5. ما احلها ابتسامة لانها صادقة جدا ومن القلب :)

    ردحذف
  6. جميلة يا بوسي

    ردحذف
  7. فعلا حاجات تخلي الواحد يبتسم لا شعوريا
    حتى من غير ما نكون شفناها بجد .. كفاية قرائتنا ليها هنا :) شعور جميل

    ردحذف