5 شلل !!

هو اساساً كان اسبوع غريب مريب اقدر اجزم بده
بس إتضاف ليه 5 حاجات
خلته يستحق لقب افضل اسبوع مشل على الإطلاق
!! :@

1- رغدة :رغدة موقفها من الثورة السورية اكيد معروف هى بترفض الثورة السورية رفضاً باتاً ومع ذلك هى من اوائل المؤيدين لثورة المصرية .
لما سألها المذيع عن موقفها قالت ان الفساد الثورى كان مصدره مجموعة ناس جوة النظام مش بشار ، طب مش ده برضه اللى بيقوله اى حد من انصار النظام المصرى واللى هى كانت مع الثورة اللى ضده !!
مش مستوعبة ازاى واحدة يبقى عندها وعى ثقافى وسياسى يعنى ببساطة بتفهم ويبقى عندها تناقض واضح اوى كدة بالرغم من ان المفروض ان المبدأ واحد !

.
.
.....

2- دلاية بثينة كامل :
بثينة كامل لابسة دلاية عليها هلال مع صليب حلو ، اول ما شوفتها فعلاً عجبتنى جداً واتمنيت انى اجيب واحدة زيها كمان .
كانت فى برنامج "الشعب يريد " مع طونى خليفة المهم سألها عن الدلاية وانها امتى لبستها وكانت اجابتها اللى المفروض نسقف بعدها : " لبستها بعد الثورة ، لأن كان فيه فتنة طائفية فى مصر قبل الثورة والثورة جت وغيرت ده !! " بعدين طبعا قعدت تعدد حوادث الطائفية اللى حصلت فى السنين الأخيرة !!
بجد اتبهرت !!
واتأكدت ان بثينة كامل المرشحة المحتملة لرئاسة جمهورية مصر ... متنفعش !
لانها متعرفش اقل حاجة عن المصريين وايه هى علاقة المسلمين والمسيحين بجد وانها هى هى قبل وبعد 100 ثورة كمان !!
هى عايزة تكسب تعاطف الجانبين المسلم والمسيحى بأنها بنى صاحبة قضية بس للأسف بتكسبه غلط !
وخلاص مش عايزة زى الدلاية دى غيرت رايى !!!!!

.
.
.....

3- اشك :

هل يستحق الاحترام من يدعو إلى الحق فى الاختيار ويؤمن أن الأدب والفن والموسيقى هى أصدق مجالات الإبداع الإنسانى تعبيرا عن هذا الحق وأكثرها احتفاء به ثم يتنصل من مشاعر حب صادقة لأديبة أو فنانة أو موسيقية تخوفا من نظرة دونية ظالمة من بعض الأهل أو من البعض فى المجتمع؟ أشك.

اشك ان عمرو حمزاوى بيعانى فعلاً مع الفيلم الابيض واسود اللى قاله فى المقال بتاعه ده لارتباطه بعلاقة عاطفية من اى نوع مع بسمة .
اصلنا فى 2011 على فكرة ... ولو بتحب رقاصة مش ممثلة المجتمع عنده إستعداد يتقبلك جداً .
لكنى مش هأشك لحظة واحدة انه عقلية ذكية حاول يظهر ان اسباب تواجده مع بسمة بعد نص الليل ( اللى الناس قعدت تلت وتعجن فيها بطريقة مستفزة جدا !! ) ده بدافع حب صادق نقى بيحافظ على سريته لأنه خايف من ردة فعل المجتمع ...
طريقة ذكية لخرس الناس المستفزة وكسب تعاطفهم واحترامهم كمان ..
ده غير طبعا بنات الفيس بوك اللى عملوا شير للمقال عل وعسى يتنحرر اللى عليه العين ويكتب فيهم اى حاجة واتحول عمرو حمزاوى لتوم كروز المصرى :DD

.
.
.....

4- الشحات :خير اللهم اجعله خير بلغنى ايها الملك السعيد ذوالعقل الرشيد ان المبجل "عبد المنعم الشحات "المتحدث الرسم بإسم الدعوة السلفية اعلن ان التماثيل دى ناتج الحضارة الفرعونية العفنة على حد تعبيره ، وان رؤوس التماثيل ولأنها اصنام زى بتاعه الجاهلية لازم تتغطى بالشمع ! .

انا شفت الحلقة وكنت بلعن امثال الإعلاميين اللى فتحوا الباب لمجموعة عجيبة علشان ينشروا افكارهم اللى ملهاش حل علينا :@@
وزى ما اتوقعت نزل مجموعة من اتباع الدعوة بعد الحلقة وكسروا رؤوس تماثيل موجودة فى منطقة كرداسة ( طبعا بيحمونا من الضلال والكفر اللى احنا فيه!! )
العيب مش على الراوى ... والعيب مش على الايادى اللى نفذت ... العيب على إعلام مغيب مش واعى بدوره الأساسى اصلاً !!

.
.
.....

5- التليفزيون المصرى :
ايه الحلاوة والجمال والطعامة دى !!
هو مش كان حجتهم النظام وانس الفقى واسامة الشيخ ..... الخ الخ الخ 
اهو كله راح لحل سبيله فى ايه بقى ؟؟
ليه اما ابقى بقرا حاجة على النت عن اسرائيل وقتلى مصريين وحاسة اكنى فى حرب من كتر الكلام اللى بيتقال والأخبار اللى بتنتقل والكل قلب صورة بروفايلاته لجنود وعلام مصرية رايحة جاية واغانى وطنية ...
والمفروض انى اروح على تليفزيون بلدى اشوف الدنيا جرى فيها ايه وانا شايفة الحرب شغالة قدامى وطبعا التليفزيون ....
هــــــــــــــــــــــس
ولا كأن فيه حاجة خـــــــــــالص 
ماهو الناس لما تعمل ثورة او اعتصام او مظاهرة بناء على معلومة مغلوطة خدوها عن النت او الجزيرة او غيره ...
لأن محدش قدملهم بديل تانى وهما كانوا قالوا لأ !!!

.
.
.....

طبعا انا اتشليت ومكنش ينفع مشلكوش معايا
كل شَلة وانتو بخير
:p

باهت

لما ترسم على الوش
ضحكة
وانت حاسس
بالمرارة
هتبقى فى الصورة
انت باهت

.
.
.....

لما يبعد حد حبك
ويقول :
" صحاب"
تسلم تعيد وراه :
" صحاب "
ويطلع صوتك
 انت باهت



.
.
.....
لما تضطر لرحيل
تمد ايــد
"مفيش نصيب"
وانت عارف
الوداع فى ايديك انت
باهــــــت


.
.
.....

كون شباك :)

لما بستنى ميعاد حد بحبه
بفضل واقفة فى الشباك
اروح واعمل اى حاجة ناقة
اتأكد انى حطيت الحلويات كمانها
وخرجت كاسات العصير من الدولاب
وارجع تانى ..
ابص فى المراية
اعدل هدومى
ابدل العقد اللى لابساه ...
مكنش لايق !
وبرضه ارجع اقف نفس وقفتى
وانا مستنية انى اشوفه فى كل حد معدى فى الشارع

الشباك  مش بيجيب اللى بنستناهم اسرع
او بيقتل جوانا احساس الإنتظار الممل
بس الشباك اول حاجة ...
ممكن تطل منها حاجة مستنينها من كتير
ومع خطوة كل واحد جديد يدخل الشارع
بيفوت لقلوبنا الامل ...

تقدر تكون شباك ؟!!
:) :)

دهشــة

أمسك سلحفاتى الصغيرة
اضعها بكف اخى 

تحرك السلحفاة ارجلها 
فوق كفه الصغير ...
يسحبه سريعاً
مدهوشاً من ذلك المتحرك الغريب ...
يبتسم ..
أظل احملها بيدى ..
يقرب كفه إليها مرة اخرى ..
تعلو صوت ضحكاته ..
يبعد كفه فيقربها ثم يبعدها 
يعيدها مرات 
محتفظاً
بنفس الدهشة 
ونفس تلك الإبتسامة الرائعة

لاشك ان يكون دعائى كل صباح :
"اللهم هب لى دهشة اطفال تحفظ لى بسمة قلبى فوجهى ... ابداً"

التلافزيون

بصوا بقى ماهو الحاجة دى مينفعش نسترق ونقول عليها تى فى ولا تليفيجين بقى والحركات دى ..
وحرام حتى نقوله عادى تليفزيون >>> هو " تلافزيون "
ولأن رمضان موسم التليفزيون اللى بيطلع فيه ابداعاته 
حسيت فعلاً ان السنة دى بدّع :DD

1- مسلسلات :متكروتة وباين جداً انها متكروتة ، فيه تفاصيل مهمة مش موجودة ، حبكة مش منطقية ، ممثلين بدائين مش مبتدئين .
يمكن فلت مهم الكبير اوى رغم انه مسلسل كوميدى مش ليه هدف قومى زى مسلسلات الثورة والعصابات والجواسيس ، بس كان مسلسل مهتم بالتفاصيل باداء ممثليين بحوار ..(حقق غايته على الاقل ) .

2- مقالب :| :
دى بقى حدث  ولاحرج ، ايه كمية السخافات دى !!!
مقالب تحس ان اللى معمولة فيه بيجاملهم فبيكمله تقضية واجب ، إستظراف ورخامة وسماجة فى الغالب ، يمكن زى العسل بيفضل المقلب الوحيد اللى محافظ ان فكرته تبقى جديدة ، وطبعاً استحق لقب الافشل عن جدارة " ما تيجى اقولك" حسين الإمام .
بجد ياريته ما قال !!

3- برامج :الحمد لله خلصنا من البرامج اللى بتدخل فى حياة الفنانين الشخصية بطريقة استفزازية ، والواحد  ملحق يتنفس الا وطلت علينا كل البرامج اللى بتتكلم عن الثورة 
من كل نوع ، وطبعاً لإما بتطلع الضيوف ابطال "ورق" ، لإما بتطلعهم شرفا حافظوا على وطنهم او بتشكك فى ذمتهم الوطنية بإختصار برامج ملهاش هدف عاملة زى ما اسأل واحد بيصلحلى حنفية الماية انت مسلم ولا مسيحى ؟!
ما المهم انه يصلحها وخلاص برضه الممثل انه يمثل وخلاص ويكون عنده وعى حد ادنى من الوعى باللى حواليه علشان يقدر ينقلنا الوعى ده فى اللى بيمثله .... غير كدة المفروض يكون ماليش :|

4-الإعلانات :للمرة الاولى اقول انى بستنى الإعلانات ومش بحول التليفزيون عليها اما بتيجى ، الاعلانات موسيقى افكار كلام كلها مليانة روح حتى إعلان "دايــم " مع ان تحسه قديم بس الأغنية بالحركة دى بجد تجنن  يمكن معجبتنيش إتصالات بس فى الغالب الكل مستواه تماااام، طبعاً اكتر اعلان عبقرى حبيته كوكاكولا <3

5-الزحمة :
آخر حاجة بقى وهى الزحمة ، قولنا فيه ثورة والناس معهاش فلوس كروتلنا حاجات وبرضه زحمولنا التلافزيون الواحد مبقاش عارف يتنفس نفسى انهم يفهموا ان الموضوع بكل درجاته كيف ومش كم خالص على فكرة ;)

وطبعا لأن التلافزيون بالشكل ده 

بالظبط ملوش اى تلات الاف لازمة

ولأنه كمان كام سنة لو مغيرش من نفسه 

هيشغل حيز كبير فى بيتنا من غير لازمة

والدنيا مش ناقصة زحمةفأنا قولت نستفاد بيه بقى ^_*

مصيـــر

اسقط عبارتى الأخيرة
فوق تلك الورقة
تزهق انفاسها
سريعاً ..
أتخلص من جثمانها
تحمله بعيداً
ممحاتى ..
تولد رفيقاتها
من رحم قلبـى
ميتّة ايضاً ..
أهو مرض أصاب كلمات قلبى
لرحيلـــه "هو"
من كان
 أكسجينها .. ؟
فأحال مصيرها
موتاً
وقلبى مرضــاً
وأوراقى
 دوماً بيضاء

رد الـ سكـــوت

بيصروا يبقوا موجودين
يوجعك كلامهم
يوجعك سكوتهم
بيوجعوك وخلاص !
الوجع هوايـــة بيحبوا يمارسوها عليك ..

بتعمل مخدتش بالك ..
بتعذرهم كتيـــر اووى
بتمل ..
بتقاوح مع نفسك ..
بتسأل ...
بتجر كلام ...
والرد دايماً سكــــوت

عارف انك ممكن ترد عليهم
 بكلام يجرحهم
عارف انك ممكن
تنهى وجودهم فى حياتك
بضغطة زرار
وكام يوم إحبـــاط تعيشهم
ومتأكد
هتبقى كويس بعدين

ولأنك مبتحبش تجرح حد
ولأنك مؤمـــن
ولأن العين بالعيـــن
فالرد المناسب
 للسكــــوت دايماً :
" تجـــــــــــــــــــــــــاهل "

شهر سىء !

دقت الثانية عشر منذ دقائق
ليبدأ يوم رابع عشر جديد ...
اليوم تمضى ثلاثة أشهر 
ويمضى معها كل شىء
 شهر سىء اعتـــــرف 
غضب وضجر وهـــم كثيــر
كنت اقـــول غداً سيكون الأفضل
وسينتهى كل شىء ...
ولم ادرك ان كل شىء 
حقاً سينتهى .. !!!

الساعة : 12:14 ص
اليوم : 14-8-2011

دعاء

وكأنه لا يـــزال هنــــا

يظل لســـانى يردد اسمه 

بطـــــول سجـــــودى 

الم تتـــرك لى شىء 

حتى دعاء صلاتــــى !

وجع

جوايا واحدة موجوعة منــــــ ـــى ...

حتى تنفقوا مما تحبون ...

كلنا بنساعد المحتاجين
ف اللى بيدى على طول اى حد يطلب المساعدة
وفيه اللى بيفكر شوية
وفيه اللى مبيديش الا الناس اللى هو اثق في حاجتهم اصلاً
بس كلنا مرتبطين باننا بنساعد اللى محتاج باللى نقدر عليه
ان كانت فلوس او اكل زيادة عن حاجتنا
هدوم قديمة كتب دراسية قديمة عندنا ... الخ الخ الخ بقى
ماما بقى مش بتتردد
 وتدى حتى لو كانت ناوية تعمل بالفلوس اللى معاها حاجة
وكان دايما ربنا بيرزقها ان يقبضوا علاوة مش ميعادها 
مكافأة مش عاملة حسابها عليها
او حتى يكون القبض جاى ليهم بدرى الشهر ده
(( لَنْ تَنَالُوا الْبِرَّ حَتَّى تُنْفِقُوا مِمَّا تُحِبُّونَ ))
وقفت قدام الاية دى كتير اوى
وافتكرت اللى ماما كانت بتعملهربنا كان بيرزقها بالخير
 وهى فاكرة انها علشان ساعدت حد محتاج
بس الصح ان ربنا كان بيرزقها خيــر
لأنها كانت بتدى من حاجة هى محتاجاها
بس فَضَلت حاجة الناس عن حاجتها

ربنا يرزقنا احنـا كمان
ونقدر ندى من اللى بنحبه
3>

لوحدى

مش وحش ابـــــداً انى ابقى لوحـــــــدى
الوحـــــــــــدة ساعــات بتبقى ممتـــــــعة
وبتفيدنى فى انى اتخلص من مشاعر سلبية
واضمن لنفسى ريفرش حلو
بس لما ابقى لوحــــــــــــدى وانت معـــايـــا
إحساس وحش بجـــــــــد !

لو .. مش هتفتح باب الشيطان ^_^

جبت مجموع 87 فى الثانوية العامة علمى *
لو كنت جبت مجموع عالى فى الثانوية كان زمانى دخلت كلية علوم اللى ماما كان نفسها تدخلهالى ، وكان زمانى اكبر فاشلة عرفتها الكرة الارضية ومكنتش درست اعلام اللى بجد بعشقه 3>
****
اتخطبت ومكنتش عايزة اتخطب وفسخت خطوبتى بعد 8 ايام بالظبط *
رغم تجربة الخطوبة اللى ربنا ما يعود حاجة زيها عليا او اللى بحبهم ، بس لو انا لو مكنتش اتخطبت مكنش زمانى فوقت على الناس اللى حواليا وعرفت مين اللى جنبى ومين اللى نص نص ، ومين اللى موجود بحق حقيقى فى حياتى ومين اللى وجوده مجرد "ديكور" 
****
كتابى كان المفروض هينزل شهر 7 اللى فات ده كان اول ميعاد نشر واتأجل *
لو كان نزل مكنتش هلاقى حد يهتم بيه ، لأنى كنت بتكسف شوية ومش كان كل الناس عارفة انى بكتب وبالتالى التجربة ملهاش مؤيدين اصلاً
*****
بعد كدة كان هينزل شهر 1 فى معرض الكتاب والثورة قامت ولغيت العقد مع دار النشر اللى كنت هانشر معاها *
لو كنت نشرت الكتاب وقتها مكنتش دخلت مشروع النشر لمن يستحق ومكنتش استفدت من ان يكون اول كتاب ليا تبع دار ليلى باسمها المحترم فى سوق النشر

كل نجمة * حمرا فوق كانت اسوأ لحظات عشتها فى حياتى ( 21 سنة يعنى علشان كدة قليلين )
 وفضلت مكتئبة كتير اوى بعدها 
بس كانت الحاجة اللى بتجيلى بعدها بتكون خيــر كبير اوى ليا ، يمكن مكنتش بتوقع ان ممكن ربنا يرزقنى بخير قده اصلاً

كام مرة حاجة بتحبوها ضاعت منكم واكتئبتوا وشلتوا طاجن ستكو 

كام مرة حسيتو خلاص ان نهاية الكون جـــت وان مفيش امـــــــــل 

وكام مرة ربنا فرجها عليكم بحاجة احسن من اللى كنتو عايزنها وبتحبوها

ولما جيتو تفكروا ده لـــــو حصل الحاجة اللى كنا عايزنها 

مكنش زماننا هنبقى مبسوطيين اوى كدة زى دلوقتى 

((وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ)) - البقرة 216-

انا عندى اونيومينيا !!

متخافوش مش معدى :D

كنت بفتكر انى اما بتضايق بقعد اكل
حتى لو مش جعانة او مش عايزة الاكل ده بس بقعد اكل وخلاص
وكنت فاكرة ان الضيق مرتبط معايا بالاكل بس اكتشفت بالتجربة العملية ان ده غلط خالص ...
انا بقالى كام يوم كانت حالتى النفسية فى الحضيض او ما يقرب يعنى :D :D
شوية حاجات بايظة ومش مترتبة وناس عجيبة ....
الخلاصة كنت زفت !
وكنت امبارح فى الشارع الصبح وطبعا صايمة واتعصبت من كذا حاجة ومكنتش طايقة نفسى
ومفيش اكل طبعا
قوم الاقينى بعمل ايه ؟!
بشترى شوية حاجات ولا ليها تلاتين لازمة والله حتى انا ما بصتش عليهم لحد دلوقتى
جبت لعب وكشاكيل وخط موبايل :D :D

طب ليه ؟!!!ده سؤال صحيت الصبح واناعايزة الاقيله تفسير خصوصا وانا عمالة افتكر الماضى الاسود بتاعى ، انا لما بتضايق بشترى حاجات بس مش ببقى محتاجاها اصلا ، اكل لبس كتب كشاكيل لعب اقلام اسكتشات واى حاجة تانية ممكن تتخيلوها المهم انى بعمل كدة وافضل اشترى لحد ما اخلص فلوسى ....
وبما انى معرفش نمرة دكتور نفسانى وبما انى قاعدة ع النت طول اليوم 
وجدت الحقيقة المرة :(((

انا عندى OnioManiaاو هوس الشراء 

مشكلة المرض ده انه بيتطور يعنى لو انا كان بيبدأ معايا بكيس شيبس وساندوتشات بطنى مش هتقدر تتحملها (انا ممكن اجيب مثلا 3 ساندوتشات مع ان انا بكمل ساندوتش واحد بالعافية ) ! 
ولو مرتبى كان 1000 جنيه وبيخلص كله لما اشتغلت ، هاعمل ايه لو مرتبى زاد شوية :@@
الموضوع ممكن يخرج عن سيطرتى لانى اصلا وانا بشترى مبقاش بفكر والا مكنتش عملت فى نفسى كدة اكيد !

اسباب المرض بقى زى اى مرض نفسى الضغوط ، الطلاق او الانفصال ، الهم ، الغضب ، الوحدة ....
عارفيين انا لما قريت ده اتنكدت قد ايه ؟؟
هو ليه اللى احنا بنعمله فى نفسنا ده اصلا 
الدنيا فعلا مش تستاهل ان الواحد يتضايق للدرجة اللى ميعرفش فيها نفسه ويبقى بالغباء ده !! :@@

يمكن المشكلة اننا مبنبقاش واعيين اننا مبنصلحش حاجة بعصبيتنا او باننا نشيل نفسنا الهم ...
ده يمكن بنأذى نفسنا اكتر .... بنأذى قلبنا اللى بيفضل جواه كولكيعه نكد كدة ، وبنأذى اعصابنا ومبنبقاش عارفيين نتقبل اى حاجة او حد 
بنفقد سماحتنا اصلا بمرور الوقت وبتبقى نفسنا مقفولة والل فيها مكفيها !
ده حتى وشنا بيكون خلاص (بقى زى الشراب المقلوب ع رأى محمد صبحى :D ) 

طولت عليكو بس لأنى مخنوقة ان يوم ما يجيلى مرض نفسى يبقى اسمه عجيب كدة ^_^                                                      ربنا يبعدنا عن امراض النفس والقلب ويباركلنا فى نفسنا 
  
   للى خايف ع نفسه وعايز يتكشف ان كان عنده المرض ولا لأ يتفضل هنا 

يوم رائع !

اعتدت من نفسى امراً
 لا اعلم لما اضحكنى كثيرا
وانا بغمرة كآبتى اليوم ...

فأنا احيل يومى إلى كارثة
 إذ بدأته بثلاث كلمات :

"سيكون يوماً رائعاً " !!

كان صديقــى

تبدلت رسائل الفيس بوك على صفحتى
اصبحت تشبه دفتراً كاملاً يجمع رسائل ذاكرتى
بخزانته ،

وكان همى الاول ان اعود لذاكرتى مع ...
من كان حبيب يوماً
وصديق دوماَ
وغريب جدا عنى اليوم ،

افتح تلك الرساله
لحظات جنونية
ضحكات طفولية
نوبات عِند صبيانية
ودعوة بحب آبــــدى
اعتدنا ان ننهى بها رسائلنا كل مرة

اقلب الرسائل فاراه ...
"لطيف" هو
كما اعتدت بوصف كل نقى اصادفه بحياتى
وكان حبه كذلك ايضاً

و"عنيدة " انا
لن تظهر المــاً امامك إذ اصيبت
 إصابة كنت قد حذرتها منها يوما ولم تنصت !

تضىء ايقونة رسالتى
كان من" المدهش "حقاً ان يكون هو
وفى تلك الساعة
التى قررت ان استعيد لحظاتى معه
والمدهش ان تحوى رسالته "وداع " !

انهىَ ما بقى بيننا بكلمات مقتضبة
وكـــأنه لا يزال يقرأنى جيـــداً !
ليدفن خاطر سرى
ما لبث ان انطلق داخلى
اثــر العودة الى رسائل
صديــق قديــــــــم !!!

عن قصة حقيقة اوى 

3-8-2011
 4:29 ص

رمضان

دايما رمضان بالنسبة ليا
شهر سمـــح

بحب إحساسى انى مش عايزة اغلط
انى قوية وقد انى اتحط فى اى حاجة صعبـة
ان الناس مبسوطة
وبتمنع نفسها عن الغلط
وان الكل متجمع على حاجة واحدة

زى كل سنة كان استقبالى لـ رمضان
حاجة واحدة زودت فرحة قلبى عن كل مرة
ان دعاء الصايم مجــــــــــــــــــاب ،

يعنى هلاقى فرصة
انى ادعيلك دعاء مجاب  30 يوم ...
طول الشهر الكريم ده 

ربنـــــــا يحبـــــــــ  3> ــــــك