10‏/08‏/2011

انا عندى اونيومينيا !!

متخافوش مش معدى :D

كنت بفتكر انى اما بتضايق بقعد اكل
حتى لو مش جعانة او مش عايزة الاكل ده بس بقعد اكل وخلاص
وكنت فاكرة ان الضيق مرتبط معايا بالاكل بس اكتشفت بالتجربة العملية ان ده غلط خالص ...
انا بقالى كام يوم كانت حالتى النفسية فى الحضيض او ما يقرب يعنى :D :D
شوية حاجات بايظة ومش مترتبة وناس عجيبة ....
الخلاصة كنت زفت !
وكنت امبارح فى الشارع الصبح وطبعا صايمة واتعصبت من كذا حاجة ومكنتش طايقة نفسى
ومفيش اكل طبعا
قوم الاقينى بعمل ايه ؟!
بشترى شوية حاجات ولا ليها تلاتين لازمة والله حتى انا ما بصتش عليهم لحد دلوقتى
جبت لعب وكشاكيل وخط موبايل :D :D

طب ليه ؟!!!ده سؤال صحيت الصبح واناعايزة الاقيله تفسير خصوصا وانا عمالة افتكر الماضى الاسود بتاعى ، انا لما بتضايق بشترى حاجات بس مش ببقى محتاجاها اصلا ، اكل لبس كتب كشاكيل لعب اقلام اسكتشات واى حاجة تانية ممكن تتخيلوها المهم انى بعمل كدة وافضل اشترى لحد ما اخلص فلوسى ....
وبما انى معرفش نمرة دكتور نفسانى وبما انى قاعدة ع النت طول اليوم 
وجدت الحقيقة المرة :(((

انا عندى OnioManiaاو هوس الشراء 

مشكلة المرض ده انه بيتطور يعنى لو انا كان بيبدأ معايا بكيس شيبس وساندوتشات بطنى مش هتقدر تتحملها (انا ممكن اجيب مثلا 3 ساندوتشات مع ان انا بكمل ساندوتش واحد بالعافية ) ! 
ولو مرتبى كان 1000 جنيه وبيخلص كله لما اشتغلت ، هاعمل ايه لو مرتبى زاد شوية :@@
الموضوع ممكن يخرج عن سيطرتى لانى اصلا وانا بشترى مبقاش بفكر والا مكنتش عملت فى نفسى كدة اكيد !

اسباب المرض بقى زى اى مرض نفسى الضغوط ، الطلاق او الانفصال ، الهم ، الغضب ، الوحدة ....
عارفيين انا لما قريت ده اتنكدت قد ايه ؟؟
هو ليه اللى احنا بنعمله فى نفسنا ده اصلا 
الدنيا فعلا مش تستاهل ان الواحد يتضايق للدرجة اللى ميعرفش فيها نفسه ويبقى بالغباء ده !! :@@

يمكن المشكلة اننا مبنبقاش واعيين اننا مبنصلحش حاجة بعصبيتنا او باننا نشيل نفسنا الهم ...
ده يمكن بنأذى نفسنا اكتر .... بنأذى قلبنا اللى بيفضل جواه كولكيعه نكد كدة ، وبنأذى اعصابنا ومبنبقاش عارفيين نتقبل اى حاجة او حد 
بنفقد سماحتنا اصلا بمرور الوقت وبتبقى نفسنا مقفولة والل فيها مكفيها !
ده حتى وشنا بيكون خلاص (بقى زى الشراب المقلوب ع رأى محمد صبحى :D

طولت عليكو بس لأنى مخنوقة ان يوم ما يجيلى مرض نفسى يبقى اسمه عجيب كدة ^_^
                                                      ربنا يبعدنا عن امراض النفس والقلب ويباركلنا فى نفسنا 
  
   للى خايف ع نفسه وعايز يتكشف ان كان عنده المرض ولا لأ يتفضل هنا 

هناك 5 تعليقات:

  1. المشطلة ان الواحد حتى مش بيفكر فى اللى بيستريه
    يعنى يا ريتها حتى حاجة عاجباه .. لا ممكن حاجة أصلا عمره ما هستخدمها بعدين
    بس أهو بيشترى و خلاص ..
    أنا ممكن عندى بوادر من المرض ده , ان نفسيتى بترتاح لما أنزل أشترى حاجة
    ربنا يستر علينا D:

    ردحذف
  2. على فكرة انتى مش لوحدك

    ومش شرط هوس الشرا اللىبتقولى عليه
    كل واحد فينا له تصرف معين لما بينضغط
    انا باكل .... كتير
    يعني ال3 سندوتشات بتوعك دول فى وقت خنقه ممكن يبقو 7 :D :D

    المشكله اننا مش بنعرف نتعامل مع المشاكل
    بنسيبها تاكل من دماغنا اكتر ماهى متاكله اشاسا

    ماتتضايقيش اوى كدا انتى أحسن من ناس كتير

    عندى أنبوبه بوتاجاز وكرسى هزاز ومروحه لو حبيتي يعني :d :p

    ردحذف
  3. انا عندي نفس المشكلة
    باكل كتير وانا مخنوقة
    وبشتري برضه كتير

    ف الاخر
    احب اقولك متضيقيش نفسك حقيقي مش مستهلة

    ردحذف
  4. بصوا هى الفكرة ان الامراض النفسية كلها بتبدأ صغيرة وبتكبر

    فأنا بقلق على نفسى خصوصا انى شوفت بنى ادميين حقيقين جالهم امراض نفسية واكتئاب ووصلت انهم راحوا المستشفى

    الموضوع مقلق بالنسبة ليا بخاف انا :)

    ردحذف
  5. انك تقلقي على نفسك دا شىء طبيعي
    اهم حاجه مايكونش قلق مبالغ فيه :D

    ردحذف