02‏/02‏/2012

امبارح !

سيناريو اول
جمهور الاهلى رفع يافطة بيهين فيها رجالة بورسعيد ، استنوهم بعض الماتش نزلوا ضربوا اللعيبة والجمهور والامن متدخلش علشان خايف يتقال عليه كالعادة انه متورط ويستخدم العنف مع المواطنين .

سيناريو تانى
بعد ماتش الاهلى والمصرى المجلس العسكرى دخل ناس فى وسط جماهير المصرى علشان يولعوا فى الدنيا بعد الماتش الناس ضربت فى بعضها واتحقق المخطط !!! ، وطبعا الامن عمره ما هيتدخل علشان الدنيا تولع اكتر ...

سيناريو تالت
بعد ماتش الاهلى والمصرى حصل عنف بين الجمهورين ونزل جمهور المصرى ضرب فى اللعيبة وجمهور الاهلى ...
وعلشان المجلس العسكرى عايز يلقن الثوارا درس علشان الغاء قانون الطوارىء مرضاش ينزل يحمى الناس او يمنع المهزلة الا بعد اكتر من ساعة !





كدة مرتاحيـــن !!!!!


احساس مستفز امبارح اما يبقى كل المناقشات بتعكس ان اللى بنفكر فيه مين هو اللى هنشكك فيه ،
مين اللى هأخد منه تارى الجديد
مين اللى هألف عليه كوميكس ونكت جديدة 

 ونسينا دول ...




دول خرجوا من بيتهم
 زى منا وانت
 بننزل علشان نزور قرايبنا .. بنروح نتغدى فى النادى .. او بنروح مكان جديد مع صحابنا 
كانوا رايحين ماتش كورة علشان يتفسحوا ..
اهاليهم وهما بيسلموا عليهم كانوا خايفين علبهم من حوادث الطريق والسفر ..
مجاش فى بالهم حاجة تانى !!

اللى قتلهم مش جمهور المصرى اللى نزل ينتقم قدام الكاميرات وكأنها حرب البسوس !!
اللى قتلهم مش مجلس عسكرى سلبى او طرف ثالث او فلول وبقايا نظام !!
اللى قتلهم مش مخطط امريكا علشان نقلبها فوضــى !!!

اللى قتلهم هو 
عنف 
 طاقة سلبية
وحشية بقينا بنتعامل بيها مع كل موقف يضايقنا 

لساننا بقى بيسبق عقلنا ..
وايدينا بقت هى اللى بتتكلم 

فاكريين ازمة ماتش الجزاير ؟؟
لما قعدنا نتحسر ع العروبة ؟؟؟
الجزايريين رعبونا بس .. لكن مموتوش حد فينا

احنا اللى بنموت فى بعض ... !


معجبش من اللى يطيق بجسمه عذاب ..
واعجب من اللى يطيق يعذب اخوه ...
وعجبى ،

(( على ايام صلاح جاهين كان اقسى التوحش "عذاب "... ميعرفش ان هيجى جيل من بعده "يرعب" و"يعذب" علشان "يقتل" بضمير مستريح !! وبعدها "يسأل" بكل برود ... هو مين السبب ؟!! ))

ربنا يرحمهم يارب 
يصبر اهاليهم ...
ويهون عليهم 

آميـــــــــن

التدوينة الثانية 
حملة التدوين اليومى لشهر فبراير

هناك 6 تعليقات:

  1. يارب ربنا يرحمهم جميعا
    ويصبر اهاليهم
    لاتعليق علي كلامك هو صح جدآ :(

    ردحذف
    الردود
    1. يارب ..
      ربنا يرحمهم ويصبر اهاليهم ويهون عليهم فراقهم ... امين يارب العالمين

      حذف
  2. الحكايه مش اننا نتهم مين
    الحكايه اننا نعرف مين هو العدو الحقيقي لأمن مصر
    لما يبقى عندنا جبابرة في السجن كل واحد منهم تحت ايده اجهزة بيشغلها لازم نعرف مين العدو
    لما يبقى عندنا مجلس عسكرى بيحافظ عليهم بكل الطرق يبقى لازم نعرف مين العدو
    لما يبقى عندنا ناس متخلفين همجيين بالشكل دا يبقى لازم نعرف مين عدونا
    عدونا هو احنا فى المقام الاول
    ثم رأس الحكومه الىن والمتحكم فى البلاد لانه غير أهل للمسؤليه ووجبت محاسبته
    ثم الطغاه التى تحيك المؤامرات لنا يجب محاكمتهم كخونه على اقل تقدير

    لو معرفتش عدوك مش هاتعرفي مين انت

    ردحذف
    الردود
    1. وعندك كمان المؤامرات الخارجية ، والناس اللى من برة اللى مصلحتها تخريب الامن الداخلى ..

      والناس اللى واخدة فلوس علشان تحصل فوضى ..

      لو شاورت على حد وقولت عليه متهم بيفضل ده تخمين منك ... حتى لو بتربط خيوط لانك ممكن تربط نفس الخيوط دى بالعكس وتطلعلك نتيجة تانية خالص ...

      يعنى انت هتبقى مستنى ان الحقيقة تظهر عن طريق تحقيقات ربا يساعدنا بيها اننا نعرف الصح من الغلط ...
      بقالنا سنة مستنين نعرف اى حاجة ومفيش .
      مستنين ناس تتحاكم محاكمات حقيقية مش بس صورة المحاكمات اللى بتتنقل كل كام يوم ..
      ومفيش فايدة ..

      لازم احس ان فيه عيب منى على الاقل احاول اصلحة بدل ما افضل واقف بتفرج وفاكر انى كدة فى السليم ...
      لحد ما الحقيقة تظهر وحدها ....

      يمكن انا بحدد موقعى اما بعرف مين عدوى ... بس انا مش مهم عندى ناو اعرف انا واقف فين ..
      حتى لو تايه فى مكان معرفوش...
      بس الى لازم اعرفه انى لما اتحرك خطوة ابقى عارف الخطوة دى هتودينى لفين وياترى انا بمشى لقدام ولا برجع ورا تانى ...

      حذف