نظرية !

الحب مش محتاج اكتــر من علبة خاتم جواز ((فاضية)) ♥ !

بطل الفيلم مكنش غبى وهو بيهدى حبيبته اللى مش عارف يصرحلها بحبه علشان ظروفه الوحشة 

علبة خاتم الجواز الفاضية
وهى مكنتش مغفلة وهو بتقوله ( البسنى اياه !! )

مشهد عميق اوى مش مجرد واحد بيتحجج بالظروف
علشان يقولها نسيب بعض ده انا مقدرتش اجيبلك الا علبة فاضية
لأ .. ده واحد بيقدم كل اللى بيقدر عليه علشان يفضل قريب من اللى بيحبه
اقنعها  ♥♥

واقنعنى كمان ..
 مفيش حاجة اسمها ظروف !! ;)

***

الحب مش محتاج وداع قاسى !!

مش منطق ابداً انى هاكون ببعد عن ناس بحبهم وانا بسيبلهم الوجع ،

ادوس عليهم واعمل نفسى مش واخدة بالى علشان من وجهه نظرى انى بخليهم ميتعبوش فى بعادى ...التعب موجود طالمـــا ليك مكان فى قلب اللى بتفارقهم 
وكل ما كان مكانك اكبر كل ما كان كل يوم مش بتكون هنا جنبهم بيكون ملوش لازمة !

ازاى تجروْ تبعد عن حد انت كل دنيته ؟!! :\

***

بنغلط !لما بنغلط ساعات بنحتاج ان اللى غلطنا فى حقه يعذرنا ... يسامحنا من قلبه
الدنيا كلها ممكن تتغير

بكلمه عذر من قلبنا لحد غلط فى حقنا ...
وحتى لو كان يقصد ! :)

***

دور ...

دور على الحاجات اللى بتبسطك .. فتش عن التفاصيل دور على الاماكن ... الاصوات ... مهما كانت ملهاش معنى عند اى حد غيرك !
دور على البنى آدميين اللى بيخلوك انت ...  ♥

دور على نفسك .. دور على اللى بتحبه
وخليك على طول قريب من كل حاجة انت بتعشقها
 ♥ ♥

***

إنســـان 

مش لازم اللى بيهتم بينا يكون ماما وبابا واخواتى ..
مش لازم اللى بيحسسونا انهم قريبين يكونوا صحابنا الانتيم ..
ساعات مجرد حد يهتم بيك مش لغرض الا انه نفسه يشوف إنسان مبسوط .. بنحتاجه
واحساسى ان فى حد زيك دايماً موجود علشانى .. مش بحتاج غيره ! :))

Always

Sunset on Third Street 

三丁目の夕日

الفيلم ده اتفرجت عليه من شويــة مع علياء واحمد اللى مكنش هيكمل طعم الفيلم من غيرهم

♥ ♥ ♥
ورغم انه فيلم بسيط جداً ..
بس كان ليـومى مُلهم اوووى ♥

لينك التحميل للى حابب :
http://avaxhome.ws/video/genre/drama/always_sunset_on_third_street.html

احتاج احياناً لأكثـر!!

احياناً احتاج لأكثــر من زجاج مغلق بإحكام يمنع ضربات هواء بارد تثلج جدران حجرتى ...

احياناً احتاج لأكثـــر من جاكيت يحتضننى وقفاز اسود يلثم كفـــى ...

احياناً احتاج لأكثــر من غطاء صوفى وكوب دافىء يسربا الدفء لأطرافى ...

احياناً احتاج لأكثـــر من شال ازرق يلتف بحنان حول عنقى ...

احياناً احتاج احتاج لأكثر من مطر يهبنى فرح قدوم الشتاء ...

 واغراض شتوية امارس بها طقوسه ...

 و دومــــاً لا احتــــاج لأكثــــــــر ... منــــــــك !

:)

انتخب شكــراُ

28-11-2011
الساعة 12:50 د ظهراً

ظهرى خلاص كان بجد مش مخلينى قادرة امشى بس كنت حاسة انى عملت حاجة محترمة ، تستحق انى اعزم نفســى على شيكولاتاية فلوت مثلاً :))

الطابور بجد كاااااان طويل جداً بامتداد كوبرى بحاله الناس واقفة ولحد باب المدرسة اللى على ما وصلتله فضلت واقفة يجى 3 ساعات ونص .
الحلو ان كل الناس استحملت الوقفة الطويلة دى خصوصاً ان المطرة كانت مطينة الشارع وبجد كنا واقفيين فى مأساة ! :@
بس الناس كانت مصرة يمكن كان فيه نسبة خايفين من حكاية الغرامة بس الغالب كان بيتكلم انه عايز يغير
(( فن التغيير ده حلوة بجد  ♥ !!))الناس متحمسة كله بيحاول يفهم كله هيعمل ايه بالظبط ... كله بيطمن كله على ان الوقفة دى اخرها لينا ... وبنفكر بعض ان صوتنا امانه !!
وبجد مش هاقدر اوصف فرحتى وانا بشوف ناس كبار 50 سنة واكتر ومع ذلك مصممين انهم يعملوا حاجة :)) ♥♥
يمكن بس فيه كذا حاجة عكرت مزاجى فى اليوم /
اولاً : الدعاية اللى بالعربيات والميكروفانات والمندوبين اللى استمرت لحد واحنا واقفين فى الطابور .
ثانياً : المناديب اللى استغلوا ان ناس كتير فعلاً مش بيعرفوا حتى يقروا ولا يكتبوا ونفسهم ينزلوا ينتخبوا ، وقعدوا يكتبوا للناس فى ورق معاهم ينتخبوا مين وارقامهم ايه ورموزهم ايه :@@ وللاسف دى كانت نسبة كبيرة اووى !!!
ثالثاً : وانا فى اللجنة فوق ، كان فيه واحدة قدامى فمعلمتش فى ورقة القايمة فالمراقبة فى اللجنة بتسألها وكدة طلعت علشان المندوب كتبلها فى الورقة رمزين بس ، والناتج ان الست اختارت الرمز التالت ((القايمة)) عن طريق الرمز اللى عجبها !!!
رابعاً : سؤال فضلت اسأله لنفسى كتير واتكرر فى كذا لجنة ، هو ليه فى مناديب من حزب الحرية والعدالة جوة المدارس وبيطلعوا ويوصلونا ويأكدوا علينا رمز الميزان متنسوش !!! :@@
خامساً : بما انى وقفت قدام المدرسة اكتر من تلات ساعات اقدر اقولكو ان لسة فينا ناس متعرفش ان النظافة من الايمان ... ، وهما بيرموا الورق اللى بياخدوه من المرشحيين على الارض بكل براءة :SS

يمكن فيه سلبيات ، بس اول الغيث قطرة وانا متأكدة ان الغيث اللى جاى هيجيب محصول فيه البركة ;)

العيب مش فيــا .. العيب فى الضـى !

للشاعر محمد نــــاصر :

إن ماقدرتش تضحك

ماتدمعش ولا تبكيش

وإن مافضلش معاك غير قلبك

إوعى تخاف

مش هاتموت هاتعيش

وإن سألوك الناس عن ضى

جوه عيونك مابيلمعش

ماتخبيش

قولهم العيب مش فيا

ده العيب فى الضيّ

وأنا مش عاشق ضلمه

ولا زعلت الضيّ

ومسير الضى لوحده

هايلمع

ومسير الضحك لوحده

هايطلع

مابيجرحش ولا يأذيش

وإن ماقدرتش تضحك

ماتدمعش ولا تبكيش

وإن مافضلش معاك غير قلبك

إوعى تخاف

مش هاتموت هاتعيش

وإن سألوك الناس عن ضيّ

جوه عيونك مابيلمعش

ماتخبيش

قولهم العيب مش فيا

ده العيب فى الضيّ

ما تدمعش .. ولا تبكيش ! :((

(( التدوينة الثامنة ))

حملة التدوين اليومى

من 11-11 الى 12-12

حديث الودعات ..

تمر بجوارى تردد ندائها ...
"اقــــرا الودع !"
اتأمل جلبابها الاسود يطل من اطرافه ثوب اخضر يخترق السواد ..
يقابله بالاعلى ضفيرتها البيضاء المجعدة ..
ترمى بقطع ودعاتها لاعلى  فيلقفها كفها مرة اخرى ..
تصطك الودعات فتصنع لحنـــاً مميزاً لكلماتها ..
اقترب منها ،
لطالما اردت ان اختبر "تجربة الودع" تلك ..

"لترينى عمراً قادماً ايتها الودعات الصغيرة"
يرتجف قلبى لكلمات حدثت بها نفسى
يتراجع
تتراجع خطواتى
يستطرد قلبــى :
"واخشـــى ان ترينى عمراً قادماً ... دونـــه ! "ابتعد عنها 

((التدوينة السابعة ))

 بحملة التدوين الالكترونى :

من 11-11 الى 12 -12 

عيـــــــب !!

امبارح الصبح كتبت استاتيو على الفيس بوك :

هى ليه لغة الحوار بقت ركيكة كدة !!!!

هو علشان ابين انى عبقرى سياسة لازم اشتم واقل ادبى :@

عيــــــب :|

وده طبعاً علشان كان فيه طريقة كلام من كل الاطراف فى غاية القبح 

بنات قبل الولاد بيتبادلوا كلام بطريقة متنمش ابداً ان اللى شغالة فى الميدان دى ثورة حضارية !!

اتهامات بالتخوين ياريتها اكتفت بس بكونها اتهامات 

ومش عارفة اوصفها باى حاجة الا انها قلـة ادب !

.

.

.

بليل بقى او بعد خطاب المشيــــر بمعنى اصح :D

مكنتش تقدر تفرق بين ان دى هوم الفيس بوك ولا خناقة فى حارة 

منتهى قلة الادب 

اقذر الشتايم 

وللاسف مفيش فرق فيها بين بنات وولاد 

كلــــه بيشتم واكن العذر انهم متعصبين :@

.

.

.

افتكــــروا اننا شعب عايز يثور عن اوضاعه اللى مش عاجباه 

وان خلل الاخلاق ده اهم 10000 مرة من 100 حــــاكم مستبد 

وان اللى قلــــة الادب اللى بقت الاسلوب الامثل لتعبيــــر اغلب الناس عن غضبهم 

.

.

.

عيــــــــــــــــــــــــــــــــــــــــــــــــــــــــــــب !!!

((التدوينة السادسة ))

 بحملة التدوين الالكترونى :

من 11-11 الى 12 -12 

حكاية كلـب (مع الاعتذار للفصيلة الوفية!)

النهاردة انا كنــت راكبة ميكروباص 
ومكنتش مركزة اساساً
المهم وانا راكبة لقيت راجل قدامى بيقولى ان السواق عايز قلم 
قولت اكيد من شكلى وماسكة كتاب الكورص وكدة فأكيد عرف انى طالبة
((بخدع الجمهور وبصغر نفسى :$$))المهم 
طلعت للراجل القلم واديتله بسلامة نية 
بعدها بقى كل شوية يرجع وشه لورا ويبصلى 
وبقيت قلقانة اوىبعدها بشوية رجعهولى ولقيته بيشاورعليه كدة 
فأنا مفهمتش بصيت لقيته سايب ورقة معلقها فى غطا القلم 
روحت ماسكة الورقة ورامياها على الارض 
وبجد كنت مخضوضة جداً وانا اصلاً بخاف من خيالى 
بجد اترعب :Sلقيت ست كبيرة قاعدة جنبى كدة
قالتلى بصوت عالى هو يسمعه :
الورقة دى فيها ايه ؟؟
قولتلها وانا وشى كله قرف مع خوف :
معرفش لقيته حاططهالى فى القلم 
قالتلى :
هاتيها كدة 
روحت وطيت على الارض وجبتلها الورقة بطراطيف صوابعى 
((ولا كأنى شايلة صرصار :\))
واديتها الورقة كان مكتوب فيها رقمه واسمه راحت قالتلى :
ارميها فى وشه ،
انا شايفاه اصلاً عمال يبصلك ويغمزلك من المراية وانتى مش شايفاه ففضلت باصالها شوية كدة 
وبجد كنت مترددة جدااااااااااً
وبعدين روحت خدت الورقة منها ورميتها عليه .
.
بعد ما رميت الورقة متحركش حركة تانيــة
وفضل ساكت ولا بقى يتلفت بظهره زى ما كان بيعمل
ولا بيبص فى مراية ولا بتـــاع
كــــــــان زى الكلب
 (سورى يعنى للكلب طبعاً :$ ).
.
وانا نازلة الست حست انى خايفة انزل علشان هو كمان كان بيجهز نفسه ينزل فعلت صوتها وقالتلى خلى بالك من نفسك 
وابقى خلى حد ينزل وراكى بقى ولا يضايقك 
.
.
الراجــــل رجع قعد فى مكانه تانـــى زى .... ولا بلاش 

من غير الست معرفش كان زمانى حصلى ايه 
كام بنى آدم زى ده ماشيين وحاطين رعـــب فى قلب كل بنت 
هو ميرضاش ان حد من اهله يحس بيه 
بما ان الشىء بالشىء لازم يُذكر
وبما اننا بنعمل ثورة على الحكام
اعتقد الاحق اننا نعمل ثورة ضد عديــمى الاخلاق والضمير
محتاجين كلنا نكون الست اللى كانت قاعدة جنبى
وانا ((اللى مش جبانة)) اللى رمت الورقة فى وشه !

((التدوينة الخامسة ))

 بحملة التدوين الالكترونى :

من 11-11 الى 12 -12