19‏/10‏/2011

آميــــن


اللهم أرضنا بقضائك 
وبارك لنا فيه 
حتى لا نحب تأ خير ما عجلت 
ولا تعجيل ما أخرت

.
.
.
.
آميـــــــــــــــــــــن

18‏/10‏/2011

نقطة ومن اول السطر ;)

كان نفسى ابدأ فى تحضير الدراسات العليا السنة دى ،
بس ساعات اللى نفسنا فيه مبيكونش
 واضح قدامنا بالدرجة الكافية اللى تخلينا نبعد عنه اى تشويش 



سمحت لنفسى انى مركزش على هدفى كويس ..
وبقيت ارمى قدام طريقى ليه
طوب يبعدنى عنه اكتر ..
يمكن السنة دى كلها بعتبرها اوت منى
او انا اللى اوت اصلاً من نفسى !

مبقتش بركز ... بقيت عصبية
اتخليت عن دماغى
ورجعت عيلة طايشة فى ثانوى ..
حتى مكنتش تشبهنى وقت مانا كنت قدها !

بقالى فترة بتعامل كأنى ضيف شرف ..
سايبة الدنيا هى اللى تحركنى ..
بس مش مهم ...
لكل جواد كبوة ..
علشان كدة ... نحط نقطة
.
ونبدأ من اول السطر بقى ، ;)


إضراب مع سبق الاصرار !

اقروا الخبر ده كدة ....

انتو مستوعبين اللى احنا فيه !
الموضوع مبقاش مدرسين مراحوش مدارسهم فهيدوا للتلاميذ 3 ايام اجازة ، وهيـــــه بقى ..
ولا بقى بتوع هيئة نقل مش عاجبهم حالهم وتبقى 3 4 ساعات جوة عربيتك فى الطريق "محبوس فى الزحمة" ... ، او تفضل فى الشارع متطلم مش لاقى المواصلة اللى على قد فلوسك !
ولا بقت مصالح ناس تتعطل واوراق تاخد فى دورتها وقت اطول علشان شوية موظفين كتبوا يفط وسابوا مكاتبهم ونزلوا بيها على باب الشركة ولا المصلحة اللى شغاليين فيها ...
دى بقت حياة ناس !
انا مش بآمن بالفكرة اللى بتقول ان عادى حياة بنى ادم تضيع فى سبيل تحقيق مطالب الامة  !!!
ارواح الناس مش لعبة ؟؟؟ وحياتهم غالية اوى ...
"ومطالب الامة " اللى بيتكلموا عنها لو هتكون عدم المسئولية هى الطريقة اللى بنطالب بيها بحقوقنا ، يبقى عليه العوض ومنه العوض فى امة متعلمتش تبقى  مسئولة 

روى مسلم رضي الله عنه في صحيحه،
 عن ابن عمر رضي الله عنهما عن النبي صلي الله عليه وسلم أنه قال:
 ((ألا كلكم راع، وكلكم مسئول عن رعيته، فالأمير الذي على الناس راع، وهو مسئول عن رعيته، والرجل راع على أهل بيته، وهو مسئول عنهم، والمرأة راعية على بيت بعلها وولده، وهي مسئولة عنهم، والعبد راع على مال سيده، وهو مسئول عنه، ألا فكلكم راع مسئول عن رعيته))
صدق رسول الله صلي الله عليه وسلم

16‏/10‏/2011

مش عارف


عارف لما تبقى حاسس انك تايه
مش عارف المفروض 
تتبسط وتطمن ؟
ولا تفضل قلقان
 وتنكد على نفسك وعلى اللى حواليك !!

لما تبقى عامل زى الاكلة الماسخة
ملكش طعم ..
واى تصرف بتعمله بتبقى غبى 
مش فاهم نفسك 
وحاسس انك سبت عقلك فى مكان
ونسيته !

عارف لما يبقى عندك
فوبيا فجائية من الناس
خايف تبقى طيب مع اللى ميستحقش ده
وتضيع حد بيحبك علشان اتهورت
وتلاقى الحل ...
تهرب .. !


عارف لما تحس ان جواك 100 بنى ادم
اشكال والوان مختلفة 
وكل واحد منهم بيتكلم لغة 
هتموت بجد و تفهمها !

عارف 
.
.
.
انا بقى مش عارف :@

نصى بيضحك ... والتانى زعــــــــــلان ... انا شيخ فلتان !

15‏/10‏/2011

رابع عشر لم يعد !

منذ قابلتك
تعلمت العد ...

كنت انتظر
حالما انتهى يوم "رابع عشر"
لأبدأ انتظار رابع عشر جديد ...

كنت اقضى ساعات ايام
بين رابع عشر مضى وآخر آت
اكتب  ..
اليك طويلاً وعنك كثيرا .. ،
باوراقى البيضاء ...
كنت اسجل كلماتك ..
ايماءات وجهك ...
حماقاتك ...


وبشغف بائس ..اعشقها جميعاً !

كنت اظن ان غيابـــــــك
لن يكن له ادنى اثر داخلى 
ولن يصنع فرقاً ابداً
فوق اوراقى ...
ولكننى ايضاً
لم اكن اظن ان الامس
هو  "رابع عشر" !!!!



لازلت احبك .. ربما ..
ولكننى " كنت " ادمنـــك ... واليوم تأكدت من شفائى  تماماً !

01‏/10‏/2011

حريق!


امضى ايامى السابقة وانا ارمى عنى باشياء سرقتها منه
 فأحتفظت بها بجيوبى
كى يبقى ملاصقاً لى التصاق تلك السترة بجسدى ...
ايام مضيتها وانا اتنفس دخان حرائق التهمت لساعات ذاكرتى معه ،
فأقضى على كل امل يطل منها
 يرجونى ان انفخ فيها من روحى ...
فأعيد لها الحياة ...

ها انا قد انتهيت منه تماماً ...

حقاً لن يحتاج الامر سوى عود ثقاب "الخذلان" ... ليشتعل "النسيان" ... ودون رحمة !

يارب

إهداء خاص الى صديقى العزيز
"عمرو عاطف "
ربنا يوفقك يارب دايماً



***
لو البيبان كلها تتسد
والحيطان فوقيك تتهد
ادعى وقول يارب ...

لو صبحت يومك وحدك
لو خانك وباعك صاحبك
ادعى وقول يارب ..

لو اصبح مودك مهموم
مكتوب على وشك مغموم
ادعى وقول ياارب ..

لو قفل معاك 100 باب ....
و الف حبيب عنك غاب
ادعى وقول يارب ..

لو تحلم وحلمك يبعد
وطريقك دايماً يحود
ادعى وقول يارب ..

ديب ديب ثووورة !!

هوز فيه ايه يا بشر !!
كل حاجة فى الدنيا لازم تلف تلف ونرجعها للص\ثورة ولميدان التحرير ...
الناس كسالى مش عايزة تشتغل ويتحججوا لحد دلوقتى بـ "بتوع التحرير "
الناس تعمل إضرابات على الفاضية والمليانة "اسوة بمنهج الثورة"
البلطجة والسرقة عينى عينك فى الشوارع والبوليس مبيتحركش علشان يربوا "المعارضة "
والناس بتتفرج على اللى بيتسرق واكنه فيلم لستيفين سيجال ويرموا كلمة فى الآخر " لاحول ولا قوة إلا بالله ... اهو شوف اللى خدناه من الثورة " وبعدها يروح لحال سبيله مخلوش علاقة باللى اتسرق ولا اللى اتخطفت قدامه !!
ده حتى  النهاردة فى الجورنال مكتوب ان البوم عمرو دياب مكنش على قد المستوى اللى يليق بالهضبة  وفعلاً شرح المقال اسباب ان الالبوم مش حلو بس فى الآخر جاب سبب عجيب جداً ان عممرو دياب معملش اغانى الا تأييد لحسنى مبارك ومعملش اى اغانى تأييد لـ"شباب الثورة" !!

انا من الفلول ^_^
ومش من المؤيدين لحاجات كتير فى الثورة وليا اسبابى ...
بس برضه مش من المنطقى ان اى سلبيه انا بقوم بيها او حاجة زفت سكت عليها انى الزق السبب بتاعها للثورة ...!!!


البنى آدميين هما اللى بيغلطوا هما اللى سلبيين وكسالى ومش بيحبوا يتعبوا نفسهم بالتفكير ... مش عايزين يطوروا ومؤمنين ان ليس فى الامكان ابدع مما كان ...
البنى ادميين دول احنا اللى باختيارنا بنبقى منهم !!! 

******