11‏/08‏/2015

دون يدون تدوين (1)

بما ان التدوينة دي تعتبر التدوينة الأولى ليا في حملة التدوين الشهرية 
وبما ان حملة التدوين كفكرة سبب من اسباب سعادتي المطلقة في كل الوقت 
برغم من اني قليل لما بلتزم بيها لآخر تدوينة 
بس الشيء الجميل انها بتخليني احس بمجتمع المدونات وهو ايد واحدة يا بهجت :D

اغلب الناس اللي بقدرهم في حياتي اتعرفت عليهم من خلال الساحة دي ..

الناس اللي بنراقبها من بعيد والناس اللي بنقعد نقول ازاي بيقولوا اللي احنا حاسينه كدة ازاي 
الناس اللي بيغرونا نكتب عندهم تعليق واحنا اصلاً منعرفهمش ..
ونلاقينا بنحط اول في علاقتنا ..

تخيل اني اكتب حاجة فاللي يقراها يكون عارفني اكتر من ناس كتير حواليا مقروهاش ..
اكون عارفه حاجات عن ناس مش بيصرحوا بيها قدام حد ..
الفكرة ان الحاجات دي فالغالب بتلمسنا .. بتخلينا نفكر في حياتنا 
بتخلينا ناخد ردود افعال تجاه الناس اللي حوالينا ، العلاقات اللي بنخوض فيها ، حالنا احنا كحالة مُفردة كدة .

الصراحة انا مش عارفه المرة دي هأكتب عن ايه 
معنديش خطة بس ميزة التدوين كدة ان هو اللي بيعملي الخطة والحاله 

دون يدون تدوين