28‏/11‏/2011

انتخب شكــراُ

28-11-2011
الساعة 12:50 د ظهراً

ظهرى خلاص كان بجد مش مخلينى قادرة امشى بس كنت حاسة انى عملت حاجة محترمة ، تستحق انى اعزم نفســى على شيكولاتاية فلوت مثلاً :))

الطابور بجد كاااااان طويل جداً بامتداد كوبرى بحاله الناس واقفة ولحد باب المدرسة اللى على ما وصلتله فضلت واقفة يجى 3 ساعات ونص .

الحلو ان كل الناس استحملت الوقفة الطويلة دى خصوصاً ان المطرة كانت مطينة الشارع وبجد كنا واقفيين فى مأساة ! :@
بس الناس كانت مصرة يمكن كان فيه نسبة خايفين من حكاية الغرامة بس الغالب كان بيتكلم انه عايز يغير
(( فن التغيير ده حلوة بجد  
♥ !!))الناس متحمسة كله بيحاول يفهم كله هيعمل ايه بالظبط ... كله بيطمن كله على ان الوقفة دى اخرها لينا ... وبنفكر بعض ان صوتنا امانه !!
وبجد مش هاقدر اوصف فرحتى وانا بشوف ناس كبار 50 سنة واكتر ومع ذلك مصممين انهم يعملوا حاجة :)) 
يمكن بس فيه كذا حاجة عكرت مزاجى فى اليوم /
اولاً : الدعاية اللى بالعربيات والميكروفانات والمندوبين اللى استمرت لحد واحنا واقفين فى الطابور .
ثانياً : المناديب اللى استغلوا ان ناس كتير فعلاً مش بيعرفوا حتى يقروا ولا يكتبوا ونفسهم ينزلوا ينتخبوا ، وقعدوا يكتبوا للناس فى ورق معاهم ينتخبوا مين وارقامهم ايه ورموزهم ايه :@@ وللاسف دى كانت نسبة كبيرة اووى !!!
ثالثاً : وانا فى اللجنة فوق ، كان فيه واحدة قدامى فمعلمتش فى ورقة القايمة فالمراقبة فى اللجنة بتسألها وكدة طلعت علشان المندوب كتبلها فى الورقة رمزين بس ، والناتج ان الست اختارت الرمز التالت ((القايمة)) عن طريق الرمز اللى عجبها !!!
رابعاً : سؤال فضلت اسأله لنفسى كتير واتكرر فى كذا لجنة ، هو ليه فى مناديب من حزب الحرية والعدالة جوة المدارس وبيطلعوا ويوصلونا ويأكدوا علينا رمز الميزان متنسوش !!! :@@
خامساً : بما انى وقفت قدام المدرسة اكتر من تلات ساعات اقدر اقولكو ان لسة فينا ناس متعرفش ان النظافة من الايمان ... ، وهما بيرموا الورق اللى بياخدوه من المرشحيين على الارض بكل براءة :SS

يمكن فيه سلبيات ، بس اول الغيث قطرة وانا متأكدة ان الغيث اللى جاى هيجيب محصول فيه البركة ;)


25‏/11‏/2011

العيب مش فيــا .. العيب فى الضـى !


للشاعر محمد نــــاصر :

إن ماقدرتش تضحك

ماتدمعش ولا تبكيش

وإن مافضلش معاك غير قلبك
إوعى تخاف

مش هاتموت هاتعيش

وإن سألوك الناس عن ضى
جوه عيونك مابيلمعش
ماتخبيش

قولهم العيب مش فيا

ده العيب فى الضيّ

وأنا مش عاشق ضلمه

ولا زعلت الضيّ

ومسير الضى لوحده

هايلمع

ومسير الضحك لوحده

هايطلع

مابيجرحش ولا يأذيش

وإن ماقدرتش تضحك
ماتدمعش ولا تبكيش

وإن مافضلش معاك غير قلبك

إوعى تخاف
مش هاتموت هاتعيش

وإن سألوك الناس عن ضيّ
جوه عيونك مابيلمعش

ماتخبيش

قولهم العيب مش فيا

ده العيب فى الضيّ




ما تدمعش .. ولا تبكيش ! :((

(( التدوينة الثامنة ))
حملة التدوين اليومى

24‏/11‏/2011

حديث الودعات ..

تمر بجوارى تردد ندائها ...
"اقــــرا الودع !"
اتأمل جلبابها الاسود يطل من اطرافه ثوب اخضر يخترق السواد ..
يقابله بالاعلى ضفيرتها البيضاء المجعدة ..
ترمى بقطع ودعاتها لاعلى  فيلقفها كفها مرة اخرى ..
تصطك الودعات فتصنع لحنـــاً مميزاً لكلماتها ..
اقترب منها ،
لطالما اردت ان اختبر "تجربة الودع" تلك ..
"لترينى عمراً قادماً ايتها الودعات الصغيرة"
يرتجف قلبى لكلمات حدثت بها نفسى
يتراجع
تتراجع خطواتى
يستطرد قلبــى :
"واخشـــى ان ترينى عمراً قادماً ... دونـــه ! "
ابتعد عنها 


((التدوينة السابعة ))

 بحملة التدوين الالكترونى :


23‏/11‏/2011

عيـــــــب !!


امبارح الصبح كتبت استاتيو على الفيس بوك :

هى ليه لغة الحوار بقت ركيكة كدة !!!!
هو علشان ابين انى عبقرى سياسة لازم اشتم واقل ادبى :@
عيــــــب :|

وده طبعاً علشان كان فيه طريقة كلام من كل الاطراف فى غاية القبح 
بنات قبل الولاد بيتبادلوا كلام بطريقة متنمش ابداً ان اللى شغالة فى الميدان دى ثورة حضارية !!

اتهامات بالتخوين ياريتها اكتفت بس بكونها اتهامات 
ومش عارفة اوصفها باى حاجة الا انها قلـة ادب !
.
.
.
بليل بقى او بعد خطاب المشيــــر بمعنى اصح :D
مكنتش تقدر تفرق بين ان دى هوم الفيس بوك ولا خناقة فى حارة 
منتهى قلة الادب 
اقذر الشتايم 
وللاسف مفيش فرق فيها بين بنات وولاد 
كلــــه بيشتم واكن العذر انهم متعصبين :@
.
.
.
افتكــــروا اننا شعب عايز يثور عن اوضاعه اللى مش عاجباه 
وان خلل الاخلاق ده اهم 10000 مرة من 100 حــــاكم مستبد 
وان اللى قلــــة الادب اللى بقت الاسلوب الامثل لتعبيــــر اغلب الناس عن غضبهم 
.
.
.
عيــــــــــــــــــــــــــــــــــــــــــــــــــــــــــــب !!!




((التدوينة السادسة ))

 بحملة التدوين الالكترونى :


حكاية كلـب (مع الاعتذار للفصيلة الوفية!)

النهاردة انا كنــت راكبة ميكروباص 
ومكنتش مركزة اساساً
المهم وانا راكبة لقيت راجل قدامى بيقولى ان السواق عايز قلم 
قولت اكيد من شكلى وماسكة كتاب الكورص وكدة فأكيد عرف انى طالبة
((بخدع الجمهور وبصغر نفسى :$$))المهم 
طلعت للراجل القلم واديتله بسلامة نية 
بعدها بقى كل شوية يرجع وشه لورا ويبصلى 
وبقيت قلقانة اوىبعدها بشوية رجعهولى ولقيته بيشاورعليه كدة 
فأنا مفهمتش بصيت لقيته سايب ورقة معلقها فى غطا القلم 
روحت ماسكة الورقة ورامياها على الارض 
وبجد كنت مخضوضة جداً وانا اصلاً بخاف من خيالى 
بجد اترعب :Sلقيت ست كبيرة قاعدة جنبى كدة
قالتلى بصوت عالى هو يسمعه :
الورقة دى فيها ايه ؟؟
قولتلها وانا وشى كله قرف مع خوف :
معرفش لقيته حاططهالى فى القلم 
قالتلى :
هاتيها كدة 
روحت وطيت على الارض وجبتلها الورقة بطراطيف صوابعى 
((ولا كأنى شايلة صرصار :\))
واديتها الورقة كان مكتوب فيها رقمه واسمه راحت قالتلى :
ارميها فى وشه ،

انا شايفاه اصلاً عمال يبصلك ويغمزلك من المراية وانتى مش شايفاه 
ففضلت باصالها شوية كدة 
وبجد كنت مترددة جدااااااااااً
وبعدين روحت خدت الورقة منها ورميتها عليه .
.
بعد ما رميت الورقة متحركش حركة تانيــة
وفضل ساكت ولا بقى يتلفت بظهره زى ما كان بيعمل
ولا بيبص فى مراية ولا بتـــاع
كــــــــان زى الكلب

 (سورى يعنى للكلب طبعاً :$ ).
.
وانا نازلة الست حست انى خايفة انزل علشان هو كمان كان بيجهز نفسه ينزل فعلت صوتها وقالتلى خلى بالك من نفسك 
وابقى خلى حد ينزل وراكى بقى ولا يضايقك 
.
.
الراجــــل رجع قعد فى مكانه تانـــى زى .... ولا بلاش 


من غير الست معرفش كان زمانى حصلى ايه 
كام بنى آدم زى ده ماشيين وحاطين رعـــب فى قلب كل بنت 
هو ميرضاش ان حد من اهله يحس بيه 
بما ان الشىء بالشىء لازم يُذكر
وبما اننا بنعمل ثورة على الحكام
اعتقد الاحق اننا نعمل ثورة ضد عديــمى الاخلاق والضمير
محتاجين كلنا نكون الست اللى كانت قاعدة جنبى
وانا ((اللى مش جبانة)) اللى رمت الورقة فى وشه !

((التدوينة الخامسة ))
 بحملة التدوين الالكترونى :

16‏/11‏/2011

بــــرد




كنت
اذوب عشقــا فى برد يدغدغ وجهى
يتسرب من بين نسيج ملابســـى الخفيفة
يحيل انفـــى لكرة بولينج حمـــــراء
اسخر منـــها
ومن هولاء .. من يدثرون دولاب ملابسهم كلـــه
يهرولون داخل منازلهم
خوفــاً من ان تصيبهم
"نزلة برد" !

اليوم 

صـــرت اشبهـــــ ـــهم
اخشى البقاء خارجـــاً طويلاً
تذكرنـــى رجفات البــــــرد
برجفات اخرى تصيـــب
 قلبــــى ..
"لم تعد هنـــــا تُدفِئـــــــهُ !"



((التدوينة الثالثة ))
 بحملة التدوين الالكترونى :

فعل الزمن


ياريت ...
كان عندى الـــة زمن
يمكن كنت عرفت
لما هأجـــى احكى عنك لاحفـــادى ...
هأحكيك بالظبط زى مانا شايفاك دلوقت ؟
ولا هتبـــقى زى اى حد تانى ؟!!!

(( لأن الزمن بيغير شكل الصور دايماً فى عنينا ! ))





((التدوينة الرابعة ))
 بحملة التدوين الالكترونى :

12‏/11‏/2011

تواطؤ



اكتشفت النهاردة ان معظم صحابى اسمهم مرتبط باسمك ...
وان كل حروفهم مبتودنيش إلا ليـــك :(
حتـــى صحــــابى اللى ميعرفوكش ...
اتورطوا معاك ... ضـــــدى !!!!


((التدوينة الثانية ))
 بحملة التدوين الالكترونى :

رد فعل !

بيتجاهلوك
زى المغفـل بتعيدها 
"تشتكى منهم ليهم"
بيتجاهلوا الشكوى
بيتجاهلوا احساسك وقتها
مبيهمهمش غير انك عكرت مزاجهم
ولأنك مغفل
بتحس بالذنب "ضايقتهم"
تعتذر تلوم نفسك ..
زعلت حاجة بتحبها !


تنسى شكوتك وتفاهتك
تعذرهم اوى ....
"يسوقوا فيها "
تفضل قلقان ..
هى كل حاجة كويسة..

طبعاً ساكتين
ميردوش
مش هيهمهم كام رسالة بعت
وكام انبوكس اتملى بكلام منك
"إخبط دماغك فى الحيط"
سكوتهم مبيعنيش غير كدة !!

بيوجعوك اوى ... اوى
اخيراً بيكونلك رد فعل
تنفجر على نفسك
تعيط !!!!




26/8/2011
((التدوينة الاولى))
 بحملة التدوين الالكترونى :

08‏/11‏/2011

موت فراشــــة

فراشة ترقـــص
تغنـــى لأجــــلك
فراشة تمسك قلمى دوماً
تنتقى كلمات ..
تصفك
تنقل ما لا اقول لقلبك ...
وتصف ساعات لى روعتــك 
.
.
.

يوماً عنى وعن فراشتنا ...
رحلت
طال غيابك ..
ظلت تبحث ..
تركض خلفك ..
تتبع اثرك..
وزاد قلقى فقـــط عليك !
.
.
.

عدت اليوم
وحدك انت
وخلفك كانت 
ظلاً بعيداً
تهاوت على 
.
.
.

طارت طويلاً
لهثت كثيراً
بحثت خلف نيرانك دهراً ..
وبين اصابع كفى
 صارت قتيلة 
شهيدة هجـــرك..
بنار الغياب
احترقت فراشة شغفــــى بك !


فراشة جئت ألقي كحل أجنحتي .. لديك فاحترقت ظلما جناحاتي "

07‏/11‏/2011

حملة تدوين جديدة بقى ^_^

من 5 شهور تقريباً
كانت المدونة هنا
هــــــــــس
مفهاش بنى آدميين
بكتب وعارفة ان محدش بيقرا
بس متعة التدوين انه كتاب مذكرات بس الكترونى
يمكن بيغرينى دايماً اكتب فيه
وكنت بقول :
"مش مشكلة حد يقرالى او ميقراليش .. المهم انى بكتب "

فضلت سنة تقريباً بكتب لنفسى وبس
لحد شهر 6 اللى فات
اما اشتركت فى "دون"
وهى حملة التدوين اليومى خلال شهر يونيو

مش هتعرفوا الحملة دى فرقــت معايا قد ايه 
وعرفت متعة انك تكتب وتلاقى رد فعل لده
بقى عندى صحاب مدونين ، بقى عندى ناس بتقرا وبتقولى كومنتاتها
ودايماً بلاقينى بستفاد
اسلوبى اتطور كتيــــر
واستفدت بقرايتى لناس مختلفة بثقافات
واساليب كتيرة اووى

الشهر ده فى كمان حملة تدوين
اعتقد تاريخها يخليها تستحق تكون متميزة
11-11-2011
الى 12-12-2011


يــــــــــاريت كل اللى معاه رصيد دلوقتى ربنا يكرمه كدة ويبعت رسالة فاضية على الرقم ده
.
.
.
9596
ربنا يجعلنا سبب لمساعدة محتاج بجد !

04‏/11‏/2011

عن سبب ... أبحث !

اقرأ كتاب كنت قد قررت قراءته منذ شهور ، وها انا ابدأ به اليوم ، بعد ان مررت بعنوانه مصادفة بالامس فقررت ان اتخذه رفيق امضى معه اجازة العيد تلك !

أتذكر شيئاً قلته يوماً :" كل ما يمر بنا .. هو لحظة تحمل سبب "
وكنت حينها تقصد لقائنا ، بكل ما حملته تلك اللحظة من شغف ودليل حب حتما سوف يأتى رائعاً ...
***
هل أدركت سبباً جديداً اليوم ...؟!
ألحظة ان بدأت بقراءة الصفحات الاولى لهذا الكتاب فبكيت ، وانا ارى البطلة تحب اكثر مما ينبغى فلا تجد حباً الا اقل مما تستحق !
رجلاً موجعاً للقلب يلومها متهم عدم تفهمها ، جنونها ، غبائها ، يلوم طيش غيرتها ولم يلم يوماً عدم معاملتها كما تستحق !
رجلاً يرحل عنها يترك لها غيابه اياماً طويلاً يعود لدقائق يمسح اثار دموعاً عن وجهها يربت على كتفها .. يقبل كفيها ، تحمد الله طويلاً انها قابلت رجلاً حنونا مثله يمسح دموعها ، عن عمد تنسى كونه "السبب" !!.
رجلاً يأمرها ان تفعل ... ان تفعل ... ان تفعل ... ولا يستمع لها ان طلبت منه انه يبقى جوارها وقتاً اطول !
رجلاً تعترف كانت جاهلة حقاً بلغتــه ،ارادت بشدة تعلمه ، قرأته ... 
حينها رغبت بشدة لو لم تدخل مدرسته يوماً !

تطل تفاصيلك المندسة بين سطور وصفها له ، كحشوة مخدر دسها احدهم بجيب حقيبتى ، اظنها حلوى ، اتناولها كتاب جيد نصحنى به الرفاق ، لتفاجئنى انت من بين السطور ..
يخنقنى الطعم المر .. امسح لسانى .. اتقيأك ..
تُذهب عقلى على ايه حال!
***
أكان هو ... سبباً ؟
ارسل لى رسالة "دمت وحدك بهجة عيدى " ...
اى قدر هذا الذى يجعلنى بهجة احدهم لم اشعر به كما ينبغى .. ، واجد آخر "وحده عيدى"  لم يعاملنى يوماً كما استحق !!
ولما يرسل لى رسالته تلك ؟؟ ... اليوم فقط الذى قررت فيه ان استسلم بحثاً عن سبب ؟!!
***
ام صدفة لقائى الغريبة بك امسٍ ...؟
كنت ادعو الله ان اقابلك ولو عن طريق المصادفة ، واكتفيت به ليكون دعائى وحده لايام !
لما لم اشعر باية سعادة وانا اراك امامى كما دعوت الله تماماً ؟؟
الهذا علاقة ربما بكلام غريب ارسله لى قبلها بيوم واحد فقط ...، يخبرنى بضغوطاته !
انه لم يستطع الرد على رسائلى .. مكالماتى الكثيرة ، لأنه يشعر بالتعب !!
وفاجأتنى اخر رائعاً لا يشبه هذا الغريب الذى ظللت ابكى حاله ليلتها بطولها وانا ادعو ان يخفف الله من همه !!!!!!

دوماً ما كنت اجمع الاسباب فاتمسك بك وانا ارى قدرنا المثالى معاً ... ، وضعتك مرات "جمال القدر" وسببى الوحيد لأن استيقظ صباحاً فأحيا ...
لما لا اجد منطق الاسباب -منطقك- صالحاً لاجلك ابداً اليوم ...
وانا لا اجد امامى الا اسباب تجعلنى ببساطة للأبد عنك .... امضــــــــى !




03‏/11‏/2011

4 - 11 3>

(( ماما ))
لما حد بيقولى انتى مختلفة : ببقى نفسى اقوله هى مختلفة اكتر
اما حد بيقولى انتى موهوبة : بيبقى نفسى اقوله بنت الوز لازم تكون وزة صغيرة عوامة كدة ^_^


(( بابا ))
بعيداً عن مشيتى ورفعى اللى يغيظ !! :@
 اللى اكيد مروثتهمش الا منك :D
لما بدخل بيتنا بكيس اى حاجة فى ايدى ، بكون قاصداها !
ايوة عايزة اقلدك انا ^_^

(( بانسيه وبيجاد وحسن وحمزة ))
لما ابقى بايتة عند تيتة مجرد يومين ورغم انى بتبسط اوى معاها ... بس كنت حاسة كل شوية انى ناقصة حاجة ... علشان هما مش معايا 

واتصل بيهم ازعقلهم علشان سابونى كل ده من غير ما يسألوا عليا ويردوا - بطريقة مجنونة دى ولا ايه - 
- هو احنا مش لسة مكلمنيك من ساعة ! :D

(( بناتى ))
مى .. غادة .. بسمة .. سارة .. هبة .. ندا .. رانا .. رغدة .. اسما .. ماهيتاب .. مارينا .. دينا .. عليا .. ياسمين .. هدير .. هالة 

رغايين .. فقر .. بيضحكوا على اى حاجة تافهه .. قلاشين اوى يعنى :p
 نسخـــة واحدة بكذا وش .. اعجاز بجد !!

(( اصحابى ))
رغم ان الرجالة اوغاد ..:p

بس احساس ان انتو موجودين ...
بيدينى آمل انى
 " يمكن اغيـــر رأيـى " ! :D

(( انتَ ))



يقينى ان فى وقت مناسب هالأقيك
زى ما اتخيلتك دايماً 
علشان متخذلش إحساسى بيك ..
بيخلى إنتظارى مسلى !
 ^_^


هابى حب عليكو كلكو <3<3