21‏/08‏/2011

5 شلل !!

هو اساساً كان اسبوع غريب مريب اقدر اجزم بده
بس إتضاف ليه 5 حاجات
خلته يستحق لقب افضل اسبوع
مشل على الإطلاق
!! :@
1- رغدة :رغدة موقفها من الثورة السورية اكيد معروف هى بترفض الثورة السورية رفضاً باتاً ومع ذلك هى من اوائل المؤيدين لثورة المصرية .
لما سألها المذيع عن موقفها قالت ان الفساد الثورى كان مصدره مجموعة ناس جوة النظام مش بشار ، طب مش ده برضه اللى بيقوله اى حد من انصار النظام المصرى واللى هى كانت مع الثورة اللى ضده !!
مش مستوعبة ازاى واحدة يبقى عندها وعى ثقافى وسياسى يعنى ببساطة بتفهم ويبقى عندها تناقض واضح اوى كدة بالرغم من ان المفروض ان المبدأ واحد !

.
.
.....

2- دلاية بثينة كامل :
بثينة كامل لابسة دلاية عليها هلال مع صليب حلو ، اول ما شوفتها فعلاً عجبتنى جداً واتمنيت انى اجيب واحدة زيها كمان .
كانت فى برنامج "الشعب يريد " مع طونى خليفة المهم سألها عن الدلاية وانها
امتى لبستها وكانت اجابتها اللى المفروض نسقف بعدها : " لبستها بعد الثورة ، لأن كان فيه فتنة طائفية فى مصر قبل الثورة والثورة جت وغيرت ده !! " بعدين طبعا قعدت تعدد حوادث الطائفية اللى حصلت فى السنين الأخيرة !!
بجد اتبهرت !!
واتأكدت ان بثينة كامل المرشحة المحتملة لرئاسة جمهورية مصر ...
متنفعش !
لانها متعرفش اقل حاجة عن المصريين وايه هى
علاقة المسلمين والمسيحين بجد وانها هى هى قبل وبعد 100 ثورة كمان !!
هى عايزة تكسب تعاطف الجانبين المسلم والمسيحى بأنها بنى صاحبة قضية بس للأسف بتكسبه غلط !
وخلاص مش عايزة زى الدلاية دى غيرت رايى !!!!!

.
.
.....

3- اشك :

هل يستحق الاحترام من يدعو إلى الحق فى الاختيار ويؤمن أن الأدب والفن والموسيقى هى أصدق مجالات الإبداع الإنسانى تعبيرا عن هذا الحق وأكثرها احتفاء به ثم يتنصل من مشاعر حب صادقة لأديبة أو فنانة أو موسيقية تخوفا من نظرة دونية ظالمة من بعض الأهل أو من البعض فى المجتمع؟ أشك.

اشك ان عمرو حمزاوى بيعانى فعلاً مع الفيلم الابيض واسود اللى قاله فى المقال بتاعه ده لارتباطه بعلاقة عاطفية من اى نوع مع بسمة .
اصلنا فى 2011 على فكرة ... ولو بتحب رقاصة مش ممثلة المجتمع عنده إستعداد يتقبلك جداً .
لكنى مش هأشك لحظة واحدة انه عقلية ذكية حاول يظهر ان اسباب تواجده مع بسمة بعد نص الليل (
اللى الناس قعدت تلت وتعجن فيها بطريقة مستفزة جدا !! ) ده بدافع حب صادق نقى بيحافظ على سريته لأنه خايف من ردة فعل المجتمع ...
طريقة ذكية لخرس الناس المستفزة وكسب تعاطفهم واحترامهم كمان ..
ده غير طبعا
بنات الفيس بوك اللى عملوا شير للمقال عل وعسى يتنحرر اللى عليه العين ويكتب فيهم اى حاجة واتحول عمرو حمزاوى لتوم كروز المصرى :DD

.
.
.....

4- الشحات :خير اللهم اجعله خير بلغنى ايها الملك السعيد ذوالعقل الرشيد ان المبجل "عبد المنعم الشحات "المتحدث الرسم بإسم الدعوة السلفية اعلن ان التماثيل دى ناتج الحضارة الفرعونية العفنة على حد تعبيره ، وان رؤوس التماثيل ولأنها اصنام زى بتاعه الجاهلية لازم تتغطى بالشمع ! .
انا شفت الحلقة وكنت بلعن امثال الإعلاميين اللى فتحوا الباب لمجموعة عجيبة علشان ينشروا افكارهم اللى ملهاش حل علينا :@@
وزى ما اتوقعت نزل مجموعة من اتباع الدعوة بعد الحلقة وكسروا رؤوس تماثيل موجودة فى منطقة كرداسة (
طبعا بيحمونا من الضلال والكفر اللى احنا فيه!! )
العيب مش على الراوى ... والعيب مش على الايادى اللى نفذت ... العيب على إعلام مغيب مش واعى بدوره الأساسى اصلاً !!
.
.
.....
5- التليفزيون المصرى :
ايه الحلاوة والجمال والطعامة دى !!
هو مش كان حجتهم النظام وانس الفقى واسامة الشيخ ..... الخ الخ الخ 
اهو كله راح لحل سبيله فى ايه بقى ؟؟
ليه اما ابقى بقرا حاجة على النت عن اسرائيل وقتلى مصريين وحاسة اكنى فى حرب من كتر الكلام اللى بيتقال والأخبار اللى بتنتقل والكل قلب صورة بروفايلاته لجنود وعلام مصرية رايحة جاية واغانى وطنية ...
والمفروض انى اروح على تليفزيون بلدى اشوف الدنيا جرى فيها ايه وانا شايفة الحرب شغالة قدامى وطبعا التليفزيون ....
هــــــــــــــــــــــس
ولا كأن فيه حاجة خـــــــــــالص 
ماهو الناس لما تعمل ثورة او اعتصام او مظاهرة بناء على معلومة مغلوطة خدوها عن النت او الجزيرة او غيره ...
لأن محدش قدملهم بديل تانى وهما كانوا قالوا لأ !!!
.
.
.....
طبعا انا اتشليت ومكنش ينفع مشلكوش معايا
كل شَلة وانتو بخير
:p

هناك 8 تعليقات:

  1. معاكى جدااااااااااا فى كله .. بس مالكيش دعوة بعمرو حمزاوى :D

    ردحذف
  2. :D:D
    بجد حلوه اوي يا بوسبوس

    ردحذف
  3. انا الشلل دا راح من زمان
    لانه بقا عندي اتنين بلاستيك غيروا

    ردحذف
  4. 3 , 4 و 5 .. نفس كلامى بالظبط !
    نفس اللى أنا شايفاه يعنى .. عارفة أنى جاتلى عقدة من التليفزيون على بعضه بسببهم !
    كان عندى أمل أن التليفزوين يحترم نفسه بعد الثورة بس هيهات بقى !
    موضوع بثينة كامل متابعتوش .. بس فعلا دى طريقة غلط أوى انها تحاول تكسب تعاطف الشعب
    حمزاوى .. أنا عجبتنى المقالة , بس حسيت أنه مزودها شوية فى النقطة دى
    لأن الممثلين دلوقتى معتقدش أن عليهم حاجة . ده اذا كان الرقاصين فيه ناس بتفخر بيهم !

    بس تسلم إيدك يا جميلة :)

    ردحذف
  5. هههههههههههههه


    هوه عندك حق

    كله شله ؟ واحنا بخير؟؟
    خير ازاى بقى ؟

    :)

    ردحذف
  6. وكنت بلعن امثال الإعلاميين اللى فتحوا الباب لمجموعة عجيبة علشان ينشروا افكارهم اللى ملهاش حل علينا :@@

    هى دى يا بسنت

    كل مذيع من دول عاوز يعمل حلقه سخنه وبس
    مايهموش هايستفاد ايه من وراها غير اكبر نسبه مشاهدة

    يعني مثلا ليه يستضيف واحد زى دا
    ليه جمال البنا عمال بيتنقل على القنوات رايح جاى كأنه العلامه اللى ماجابتوش ولادة
    ليه البرامج هى هى فىكل القنوات
    ليه المذيعين اذ فجاه كدا بقو شبه بعض ونادر جدا لما تلاقى حد مختلف او على الاقل بيقدم حاجه مختلفه

    بجد انا زهقت من التلفيزيون كله
    ومن ماما بثينه اللى يوم ما جت المنصورة مالفتش انتباهى منها غير الضفاير اللى عاملاها
    وزهقت من عمرو حمزاوى اللى معرفش طلع منين وبقي مثار حديث
    زهقت من مرشحين الرياسه كلهم مش عارف مستعجلين على ايه
    زهقت من نفسى وزهقت منك ويلا بقى عشان ماتهورش على حد هنا :D :D :D

    ردحذف
  7. انا هتكلم عن رغدة
    ينفع اقول ان وحدة زيها عملت افلام مسخرة قبل كده وكانت خير قدوة للشباب الضايع وقدمت فن اغلبه لا يطلق عليه فن راقي او هادف
    مستغربتش اساسا انها ضد الثورة ده الطبيعي بتاع وحدة زي دي بصراحة

    اما عن التلفزيون المصري
    طـــــــــــــــــــظ بطلنا نصدقك خلاص ياتلفزيون ياللي مش مصري


    موضوعك تحفة

    ردحذف
  8. هو ده

    طبعا انا اتشليت ومكنش ينفع مشلكوش معايا


    احييكى على المبدأ ده

    انا اتشليت فعلا بكل حدث من دول على حده

    ومفيش مستشفى راضيه تستقبل حالتى النادره

    انا كان نفسى اعلق على المذيع اللى كان بيكلم عمرو مصطفى

    على التلافزيون المصرى
    وعمرو بيقول كلام يشل الحجر

    الراجل قاله فعلا ربنا يوفقك يا فنان

    عاااااااااااااااااااااااا

    انا صايم بس عجبنى الشلل ده

    صباةح الخير ومساؤه وعيد سعيد

    ردحذف