10‏/08‏/2011

لو .. مش هتفتح باب الشيطان ^_^

جبت مجموع 87 فى الثانوية العامة علمى *
لو كنت جبت مجموع عالى فى الثانوية كان زمانى دخلت كلية علوم اللى ماما كان نفسها تدخلهالى ، وكان زمانى اكبر فاشلة عرفتها الكرة الارضية ومكنتش درست اعلام اللى بجد بعشقه 3>
****
اتخطبت ومكنتش عايزة اتخطب وفسخت خطوبتى بعد 8 ايام بالظبط *
رغم تجربة الخطوبة اللى ربنا ما يعود حاجة زيها عليا او اللى بحبهم ، بس لو انا لو مكنتش اتخطبت مكنش زمانى فوقت على الناس اللى حواليا وعرفت مين اللى جنبى ومين اللى نص نص ، ومين اللى موجود بحق حقيقى فى حياتى ومين اللى وجوده مجرد "ديكور" 
****
كتابى كان المفروض هينزل شهر 7 اللى فات ده كان اول ميعاد نشر واتأجل *
لو كان نزل مكنتش هلاقى حد يهتم بيه ، لأنى كنت بتكسف شوية ومش كان كل الناس عارفة انى بكتب وبالتالى التجربة ملهاش مؤيدين اصلاً
*****
بعد كدة كان هينزل شهر 1 فى معرض الكتاب والثورة قامت ولغيت العقد مع دار النشر اللى كنت هانشر معاها *
لو كنت نشرت الكتاب وقتها مكنتش دخلت مشروع النشر لمن يستحق ومكنتش استفدت من ان يكون اول كتاب ليا تبع دار ليلى باسمها المحترم فى سوق النشر

كل نجمة * حمرا فوق كانت اسوأ لحظات عشتها فى حياتى ( 21 سنة يعنى علشان كدة قليلين )
 وفضلت مكتئبة كتير اوى بعدها 
بس كانت الحاجة اللى بتجيلى بعدها بتكون خيــر كبير اوى ليا ، يمكن مكنتش بتوقع ان ممكن ربنا يرزقنى بخير قده اصلاً
كام مرة حاجة بتحبوها ضاعت منكم واكتئبتوا وشلتوا طاجن ستكو 
كام مرة حسيتو خلاص ان نهاية الكون جـــت وان مفيش امـــــــــل 
وكام مرة ربنا فرجها عليكم بحاجة احسن من اللى كنتو عايزنها وبتحبوها
ولما جيتو تفكروا ده لـــــو حصل الحاجة اللى كنا عايزنها 
مكنش زماننا هنبقى مبسوطيين اوى كدة زى دلوقتى 



((وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ)) - البقرة 216-

هناك 4 تعليقات:

  1. (وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ)

    الله يعلم وأنتم لا تعلموووون

    ان شاء الله ربنا يكرمك بكل الخير ف اللى جاى

    لكِ تحياتى ^_^

    ردحذف
  2. معاكى حق بجد .. ربنا عمره ما بيعمل حاجة وحشة
    و عادة أنتى مش بتكونى مخططة لحاجة بعد اللى بيحصل ,
    بس ربنا بيعوضك :)
    ان شاء الله أيامك كلها تبقى خير و سعادة يا رب =)

    ردحذف
  3. الخيرة فى ما اختارة الله
    أو
    لعله خير يا مولاى

    انا كنت فى هندسه ....... ه ن د س ه

    ومانفعتش والحمدلله لحقت نفسى من تانى سنه على طول
    وسبحان الله ماشى دلوقتى زى الفل والحمدلله

    ماحدش عارف الخير فين

    لكن اللى بيفوض امرة لله فى كل خطوة من خطواته
    لو الواحد فينا بيستخير ربنا دايما فى قراراته الحاسمه واللى مش حاسمه
    اكيد كنا هانتلافى حاجات كتير وحشه مرينا بيها

    ردحذف