زحمة ... زحمة

الأغنية دى انا بسمعها من كتيــر 

بس الأجازات ليها طعم تانى 

بتخليك تلمس كل حاجة كأنك لأول مرة بتجرب ايديك ...

وبتجرب حواسك كلها للمرة الاولى ...

بلاك ثيما .... زحمــــة

اسأليني يا حبيبتي ع اللي داير في البلاد
اللي فيها صادروا حلمي وباعوا صوتي في المزاد
اسأليني عن ولاد شفتهم بعنيا دول
جربوا كل الحلول وبيفشلوا بالاٍجتهاد
احكي ليكي ألف قصة من حكاوي التعبانين
اللي عايش نص ميت واللي ميت من سنين
اللي نص كلامه كحة واللي شاف خمارة راحها
واللي اكل العيش دبحها دايرة دور ع السكرانين

زحمة زحمة زحمة زحمة

اللي نامية وفيها ثروة م الفلوس تعمل جبال
واسأليني عن كباري نايمة تحتيها العيال
اسأليني ع الغلابة واسأليني ع التقال
اسأليني ع الديابة واسأليني ع الفساد
اسأليني اشمعنى صابر ع المآسي الملهية
أقولك اني كنت واحد م الغلابة الأغبيا
اللي صبروا ف انتظار المعجزات والأنبيا
واللي فاق من وهمه فجأة لاقى كفر قوم عاد
لسة برضه قلبه طاير كعب داير فى البلاد

زحمة زحمة زحمة زحمة

اجـــــازة

مش عيب انى اقول انى ملخبطة و"شايلة طاجن ستى " ....

حاجات تافهه يمكن ...

بس اتجمعت مع بعض خلتنى مكركبة ...

عايزة احدد انا عايزة ايه من حياتى ...

وببساطة عايشة ليه ؟؟

انا متعودتش على نفسى 

انى الاقيها زعلانة كدة ومش لاقية حاجة تفرحها ...

قررت انى اغير كل نظام حياتى ...

وكان اوله ادمانى القاتل حتى فى الشغل على النت .. :@

علشان كدة انا هاخد اجازة مؤقتة ...

محتاجاها وبقووووووووووووووووووووووووووة

مصور الريس !

اول مكان اشتغلت فيه كان شركة بتبيع الوهم للناس ومن قبلهم الموظفين ...

قد ايه كنت كل ما ابص فى وش مديرينى كنت بحس انى بغلط فى حق ضميرى واى حاجة اتعلمتها طول حياتى ...

كنت زعلانة اوى من نفسى بالرغم من انى سبته بعد اقل من شهر ...

تخيلوا ايه كان هيبقى احساسى لو فضلت شهرين  ... وايه حجتى انى اقعد سنة كمان ... ولو انى كنت كملت لـ 13 سنة بعدها كان هيبقى ايه موقفى ؟!!

*****

"مصور الريس " ... بنى ادم كان منور قناة الحياة من شوية علشان يوصف قد ايه كان قاعد فى مكان فاسد ووحش و"كخة" بس كان مضطر للأسف ..!

الراجل اللى كان متضايق انهم بيضيعوله وقته فى تصوير حاجات تحتاج 3 4 ساعات فى 4 ايام مثلا ، وان صور الهانم - سوزان مبارك - كانت بتحتاج برامج فوتوشوب علشان هى عجوزة ومش معترفة بسنها وعايزة تطلع حلوة ...

وبالرغم من ان المذيعة ردت : الستات كلهم كدة ...

قالها بحنكته : لا الحلو حلو مهما عجز مبيحتجش لحاجة ....!

الراجل صرح تصريح خطير ان جمال مبارك فى السنين الاخيرة كانوا بينادوله يا "ريس" ( قضية توريث يا معلمى طبعا )...

وحل تحليلاته العميقة فى علاقة زكريا عزمى وصفوت الشريف اللى عاملة زى "الديوك " ، وان صفوت الشريف تقيـــل ....، وجمال كان عايز يتعلم السياسة من ابوه واتعلمها غلط !

بس الراجل كتر خيره الصراحة  قال : الريس كان ليه مواقف انسانية كتيرة ... يعنى مرة انس الفقى كان بيقولى خلص التصوير بسرعة ... راح الريس قال لانس الفقى : ما تسيب محمد يكمل شغله يا انس ..اصل هو كان بيحب التصوير اووى !!!!

*****

ببساطة واعذرونى الراجل ده كان "بيلت ويعجن " ... ايه المعلومات الخطيرة اللى قالها .... وكان بيدين مين غير نفسه ...؟!!

لما يناقض نفسه فيقول انهم مكنوش بيدوهم من الفلوس الل بتجيلهم بس كانوا بيدوهم الهدايا بس كفريق الاعلام ... ليه محسبهاش ان زكريا عزمى او غيره مكنش عايز يعاملهم كشغيله زى اللى بيشيل الشنطة واللى بيفتح الباب وباخدوا اجرتهم ...

بدليل انهم مخبوش عنهم الهدايا ...

لما يجيبوا فى وسط البرنامج صور ما ادهتنيش كتييير ...

صورته جنب جمال مبارك اللى عمال يذم فيه طول الحلقة وهو مبتسم ابتسامة من هنا لهنا ... 

ولما يقول انه بقاله 13 سنة شغال مع الناس دى ... طب كان فين ضميره .. وانسانيته العظيمة ... وليه ممشيش ؟!!

المؤسف مش ان امثال ده موجودين ... 

المؤسف اننا بنعاملهم كأبطال بيكشفوا كواليس الفساد مع انهم  شاركوا فيه وبقوة ...

لو الثورة مشت نظام فاسد ...

فهى هتخلى امثال الناس دى تظهر وكأنهم ابطال ...

وساعتها هيلوثونا ...

جوة الكادر : 

بيجاد اخويا بتاع البيو تكنولوجى واللى ملوش فى الاعلام وبيقرا الجرايد فى العافية ... بعد ما الحوار خلص ... 

قال : هما عايزين ايه من الرغى ده بقى ... هو الافلاس صاب القنوات كمان ؟!

ملقتش رد مناسب عليه ...

للأسف احنا فى خيبة كبيــــــــــــــــرة :@@

ماما

انا فضلت اكتب وامسح واكتب وامسح .....

علشان الاقى الكلام المناسب ...

وملقتش...

 بجد ...

ماما انتى احلى حاجة فى حياتى ...

ربنا يطولى فى عمرك ياااااااااااااااااااااااااااااااااااااا رب

النهاردة 19-3-2011

19-3-2011

التاريخ ده مهم اوووووووووووى ....

مش هاقولكم المصريين اتغيروا ....

بس المصريين حاسة انهم رجعوا تانى ....

نزلنا انا وماما الاستفتاء ...

 التلات مدارس بتوع دار السلام زحمة بطريقة غريبـــــــــــــــــة ... 

روحنا الملك الصالح ومدارس مصر القديمة ...

برضه زحمة ... ... 

روحنا مدرسة فؤاد جلال ... كانت اهدى نوعا مااااااا ... 

ناس من كل النوعيات جلاليب على بنطلونات على حجاب على صليب ... 

بجد حاجة تفررررررررح ...

الدنيا زحمة ورغم اننا وقفنا تقريبا ساعتين ونص ...

بس مفيش خناق ولا خنقة ...

الناس مبسوطة وبتتكلم اكننا واقفيين نستلم هدايا ....

والاهم من ده ...

ناس بتوزع ماية ...

ولاد واقفين يحموا صف البنات علشان محدش يضايقهم من برة ...

شوفت مصريين بحق وحقيق ...

وكنت مبسوطة ...

:) :)

عاش ولاد بلادى عــــــــــــــــــــ 3>ــــــــــاش

صوباعى :19-3-2011

الى التى فى خاطرى وفى فمى ....

كل كلامى وكل محاولاتى باءت بالفشل 
وانا نفسى انى اعبر عن حالك ...
وحالى من بعد حالك ...


اتغيرتى اووى ...
مبقتش شايفاكى حلوة ....
ومش قادرة البسك السواد ...


مش عارفة اتهمك انك ضحكتى عليا !!!
ولا الوم نفسى انى سبتك 
من باب انك اقوى من اى ضرر ممكن يصيبك !!


لاول مرة خايفة امشى وحدى فى الشارع 
بقلق من اى حد يبصلى تلات ثوانى على بعضهم 
انا حتى خفت انى اشيل شنطة لست كبيرة زى ما اتعودت ...!
والاخبار كل خبر اسوأ من اللى قبله ...
والنتيجة ... مبقتش مطمنة وانا فيكى :(

سنة

سنة ...
هى عمر مدونتى ....
بجد برة الكادر ساعدتنى كتير فى انى ارجع نفسى لحالة السلام والصفاء الذهنى ...
تبعملى ريموف لكل المشاعر السلبية اللى عندى
وبتعملى برضه تأكيد على مشاعرى الايجابية ...
دايما برجعلها زى كشكول مذاكراتى ...
بسترجع معاها القديم ... فبتعلم 
*****
قبل برة الكادر ....
عملت كذا مدونة زى ما بيقولوا ليا فى كل سايت مدونة :))
بس بسمة وبوكى اول ناس خلونى اعمل مدونة حقيقية ...
 فأنا بجد بشكركم يا بنوتات :) :*
وبشكر اى حد قرا المدونة وساب كومنت او ادانى امل انى مبكتبش وخلاص 
وبشكر اللى بيدينى طاقة اصلا تخلينى اكتب 3>
*****
بنصح اى حد هيقرا كلامى ناو انه يعمل مدونة ...
حتى لو مبيعرفش يكتب 
ممكن يحط اغنية صورة كلمة حكمة دعاء ....
المهم انه يعبر عن نفسه ....


بجد مبسوطة بببرة الكادر وبحبها اوى
:* :*