07‏/06‏/2012

مـ ـكـ ـسـ ـر

المشكلة ان لما انت بتركب صاروخ يطلع بيك فوق فى السما فجأة 
انت مبتحسبش بقى ان عندك فوبيا مرتفعات او ازاى هاتنزل ؟!
كل تفكيرك بيكون انك فوق ..
بس الغباء لما بفتكر انك هتفضل فوق على طول !
لأننا اصلاً مكاننا تحت 
وطالما لسة مش بنيننا مكاننا المناسب فوق 
يعنى فى لحظة ما وعلى احسن تقدير ان اللى معاك يحذرك 
"نازليين على فكرة" 
هتجرب احساس النزول القوى ده ...
بس افرض ان اللى معاك مكنش مركز 
وانت ناسى تربط حزامك وناسى تربط قلبك مكانه فتلاقيه بينط عنك
مش هتلحق تلم اجزاء قلبك اللى اتبعترت 
ولا هتلحق تحضر مرتبة كاوتش ضد الصدمات 
هتتدشدش !
.
.
 مكنش هاممنى ..
دشدشة دشدشة
 المهم انى طلعت فوق وجربت احساسى الجديد !
بس ده كان اكبر غلط
الطريق دايماً مهم فى رحلة الوصول للهدف 
مهما حاولت اوهم نفسى 
ان الوصول لهدفى كان معجزة وكان "هدية قدر جميل"
وان السرعة مش حاجة وحشة بالعكس الميزة ان مكنش فيه ترتيبات
عشوائيتى وفوضويتى الجداد كانوا عجبنى .. للاسف !
.
.
مر الوقت ؟؟ .. وقت كتيررررر ..
 بقيت دايماً ماشية معايا شنطة فيها حتت منى 
اتكسرت فى النطة اللى فاتت
شايلاها على ايدى المربوطة 
وبتسندهم روحى المشروخة من كل اتجاه !
يمكن اصادف ساحرة طيبة تخبط بعصايتها قدامى تجمعنى 
تلبسنى نفسى من تانى !
او خلاص هأكتفى بالجبس العادى بقى .. 
بس شكله هيطول !
المشكلة انى لحد دلوقتى ملقتش جبس 
بيرمم القلب !



I get weak, I get weak
And all the rules get broken in your eyes
I give it all up to you
And everything that's been keeping me together
Brings me to knees
 ... I get weak
:( :(
 westlife - i get weak

هناك 6 تعليقات:

  1. طنط سوزان كانت بتقولك ايه
    What doesn't kill you makes you sick
    and if you're sick you learned a lesson

    متزعليش ع الغلطات اللي ارتكبتيها..

    بس تعرفي فكرة اصلا انك تقبلي تطلعي فووووووق اوي في الهوا ديه فكرة جريئة..أحسن بكتير من اللي بيجي ف نص المسافة لفوق ويقف مش مرتاح...لهو وصل لفوق اوي وجازف ولا هو فضل تحت في الأمان...بقى متشعلق في النص ومهما اللي جمبه ينبهه...برضه متشعلق

    بصي ع الجانب المشرق...
    اللي هو انا مش شايفاه عشان جعانة اوي دلوقتي :D
    تصبحي على خير انا رايحة آكل
    :*

    ردحذف
  2. مش عرافة .. رضوى قالت المفيد كله تقريباً وانا مش إتبقالى حاجة أقولها ...

    ردحذف
  3. ثقي في رب العباد هو ارحم عليكي من الجميع

    وزي ما في سلبيات في الحياه في ايجابيات كتيييييييييييييييييييييييييييييييير اوي اوي اوي اوي

    اولها اني صاحبتك طبعا :D:D:D:D:D:D

    ردحذف
  4. كانت كلمة غريبة جدتى بتقولها ليا خليك قد مسؤلية قرارتك ..كلمة المسؤلية نفسها..وده على اساس انى فهمت قرارتك...عيل صغير عندة 8 سنين اكبر احلامه بلاى ستيشن وان..هيفهم ازاى بس كانت دايما تقولها لما اغلط و مع الوقت فهمت بداءت اكون مسؤل عن اى قرار انا باخده لوحدى..الخلاصة..اياكى تندمى على قرار انتى واخداه او طريق مشيتى فية مدام انتى الى قررتى يبقى تواجهى النتيجة مهما كانت ...و روحى فوق وانزلى تحت اهم حاجة تبقى مبسوطة فى كل حال مهما كان..

    ردحذف
  5. انك تطلعى فوق دى لوحدها شجاعة
    و خصوصا لو مكانك مش ثابت تحت :)
    :
    بس غلطات كل واحد بتبنيه بطريقة ما :)

    ردحذف
  6. المهم انك تقدرى توصلى تانى لى السماء بس المره دى تبقى رابطه حزام الامان ;).....CAMBABA

    ردحذف