04‏/05‏/2012

يمكن ..

مش عارفة ليه نفسى اكتب ؟؟
يمكن تأثير اللى بيحصل دلوقتى
وصوت التليفزيون اللى شغال جنبى
علشان يثبتلى ان لو انا حاسة بوجع علشان حاجة شخصية 
فيه بلد كاملة موجوعة لاسباب هى مش عارفاها  !!

يمكن الكتاب اللى لسة مخلصاه وبيتكلم عن الموت 
"الحقيقة الوحيدة اللى لازم نتقبلها "
وانا لحد دلوقتى بحاول اعلم نفسى 
انى ابطل ازعل منه انه بيختارهم هما يروحوا معاه
وبيسيبونى هنا لوحدى !!

يمكن علشان اتنين صحابى متخانقين ،
وانا نفسى يوصلوا لحقيقة 
"ان مفيش حاجة تستاهل نخسر حد بنحبه" ..
ولا علشان انا كدابة ومتناقضة
 وعارفة ان فيه حاجات بتخلينا نخسر 
اكتر حد ممكن نكون بنحبه !

يمكن علشان انا مش عارفة اكون "هنا " ... 
وحد تانى برضه "هنا" ... 
بس بعيــد اووووى !

يمكن علشان ناس كتيرة بتقولى انى هابقى كويسة وهأنسى
وانا عارفة انى هابقى كويسة ..
بس مش هأعرف انى انسى  .... !

اولأنى
حاسة دلوقتى قد ايه انا مغفلة
انى بقول انى مش هأنسى 
مع ان اصلاً 
"مكنش فيه حاجة" علشان افتكرها !!




هناك 7 تعليقات:

  1. to7faaaaaaaaaaaaaaaaaaaaaaaaaaaaaaaaaaaaaaaaaaaaa

    ردحذف
  2. صحيح بتبقى لحظات توهان صامت .. بس أد ايه بتوصلنا لحقايق مجردة مابنحبش نشوفها واحنا فايقين
    على أد ما الحزن كتير بيعمينا على أد ما بيخلينا نشوف حاجات كتير بنحاول مانشوفهاش
    الكتابه فى حد ذاتها شىء مريح حتى لو كانت شخبطه
    حاسه انك تعبانه ومحتاجه تفضفضي .. ومافيش أحسن من القلم والورق
    يمكن عشان العلاقه مابين الفراغ الحزين والقلم علاقه قديمه بتنتج دايما ابداع ما .. أو يمكن عشان هى دى الوسيله الوحيدة اللى بنخاطب فيها نفسنا من غير ماننسى اللى بنقوله
    أهم حاجه تكونى حاسه بارتياح وانك عملتى حاجه .. لانها بجد تدوينه رائعه رغم كل أحزانها

    ردحذف
  3. جميله اوي التدوينه دي يا بسنت

    اكتر من رائعه في احساسها العالي

    ردحذف
  4. جميلة ياسمسمة .. انا عندى احساس مشابه بس بكتب فى دفترى الخاص مش فى المدونة :(
    وحشانى إنتِ ... يارب تكونى بخير

    ردحذف
  5. أزال المؤلف هذا التعليق.

    ردحذف
  6. حلوة لاكن ليه الحزن او النسيان غلاطتنا و زكرياتنا هى الى بتعلمنا الحياة وبترسم عمرنا فى الدنيا مش حاجة نندم او نحزن او نتمنى نسيانها لاكن حاجة نفتكرها دايما علشان نقول اتعلمنا ....الأحساس جمييل قوى حاولى تغريى اتجاهك للأمل دايما ان بكرة احسن اكييييد....

    ردحذف
  7. جميلة جداً التدوينة .. يمكن لاني بحب جداً التدوينات اللي من النوع ده ،، ويارب تكوني بخير :)

    ردحذف