بما ان "برة الكادر " مدونتى بنتى حبيبتى ....
فانا قولت مش لازم احرمها من الخبر العظيم ده ....
"انا سبت الشغل يا بشــــر"
صدقونى الكلمة دى ثقيـــلة جداً على قلبى لما بضطر اقولها ...
مفيش أنسان مبيحبش الراحة ، بس فيه ناس برضه مبتعرفش تكون "مبتشتغلش" وانا منهم للأسف .
افتكر حتى انى وانا فى ثانوى مكنتش عارفة اكتفى بدراستى بس وكنت مشاركة فى 100 نشاط و100 مسابقة .
ونفس الكلام وانا فى الجامعة ، كنت بخلص تدريب وادخل فى اللى بعده واما نحس انا وصحابى اننا بقينا عاطليين نروح ورشة كدة على السريع :D
انا حتى اول ما اتخرجت ومن قبل النتيجة ما تطلع كنت ماسكة الجورنال - صفحة وظايف خالية -
واول ما النتيجة طلعت هووووووب روحت على اول وظيفة كانت قدامى ( بعيداً عن مأساويات الوظيفة دى )، بس على الأقل كنت بشتغل !
وبعدها ولاد الحلال ( إبراهيم ومنى ) ساعدونى فى انى الاقى وظيفة تانية ...
وادينى سبتها ... !
إحساس الكآبة كان هيقترب ...
حسيت ان هيبقى مليش لازمة فى الدنيا ، وانى خلاص هاتحول (هاربى دقنى وانكش شعرى واشرب سجاير ) ...
بس لما فكرت شوية لقيت ان وظيفتى اصلا مكنتش ليها علاقة بدراستى فى الاعلام ، او حتى الإخراج اللى بحبه ...
اه استفدت خبرة شغل وتعامل مع ناس ، بس برضه نسيت حاجات كتير فى دراستى حاسة انى بقيت مغيبـــة .
يمكن زعلت شوية انى هارجع تانى ادور فى صفحة الوظايف الخالية اللى كنت نسيتها ، بس على الأقل انا ناو متفرغة انى اشارك فى الحاجات اللى بحبها .
يمكن ربنا اصلاً خلانى اسيب الشغل علشان افوق لنفسى واعرف انا عايزة ايه من حياتى العملية ...
لذا ولحين أشعار اخر ...،
اعتبرونى سبت الشغل او بمعنى اصح "عاطلــة "
مؤقتاً طبعااااااا :D :D
التدوينة الخامسة بـ حملة : دَوِنْ
مش لاقيه رد الصراحة
ردحذفبس اكيد اللي اقدر اقوله ربنا يوفقك وتلاقي شغل احسن منه
ردحذفمريت بنفس التجربة بس كنت بشتغل فى مجال تخصصى زعلت جدا فى الاول بس ما ينفعش نشتغل علشان الشغل وخلاص لازم يكون فى هدف تانى ربنا يوفقك ويوفقنى فى اننا نلاقى اللى احنا عاوزينه وكل اللى بيدور على وظيفة
ردحذف