14‏/06‏/2011

سرحان ونفيــسة :)

لوكنتو سألتونى من يومين 
كنت جاوبت انى مبحبش السلاحف والعصافير والسمك
الكائنات دى اللى لا بتحس بعواطف ناحيتنا ولا حاسة بينا فى محيطها اصلاً ...
انا احب القطط طبعا ، الهامستر، الفار الابيض والكلاب لو كنت متعودة عليها ...
الكائنات دى اللى بتاخد وبتدى مع الواحد ...
بس دوقتى الوضع اتغير اوى ...

الاول شكل الترسا وهى بتجرى فى الماية اغرانى ...
ومقدرتش امشى الا لما اجيب اتنين ...
"سرحان ونفيسة "
بجد مشكلة ...
بقيت بحبهم 
بحب ابصلهم اوى واراقب حركاتهم ...
يعنى سرحان بيمسح بايده على عنيه زى الاطفال الصغيرين ...
نفيسة جبانة اوى دايما تروح تستخبى وراه 
اما تسمع صوت او هزة فجأة ..
سرحان نفسه مفتوحة وبيحب يجرب الاكل الجديد مش بيقلق
اما نفيسة لازم الاكل يتحط قدامها شوية
لحد ما تقرر انها تتعطف علينا وتاكله !

رغم انى كنت بعتبرهم كائن بارد  ...
بس انا مبقتش اقدر احس انى بدأت يومى 
الا لما اصبح عليهم وارخم شوية 
مبحسش انى مرتاحة الا لما ابدل الماية بتاعتهم 
واكلهم بنفسى ...
بيمدونى باحساس حنين اوى 
بيخلونى احس بالحب
بالمسئولية ناحيتهم 
مجموعة احاسيس رائعة :))


ياريت اللى ميعرفش يربى كلاب يجيب قطط
واللى مبيحبهمش يجرب الهامستر 
او يشترى قفص عصافير 
وانا من موقعى هذا قدام اللاب توب
وبجوار حوض "سرحان ونفيسة"
بنصح بشراء الترســا فــــــــــوراً
3>3>

 التدوينة الثانية عشر بـ حملة : دَوِنْ

هناك 3 تعليقات: